gis. Aussi tost dit, aussi tost execute: mais de haste que ces
gens eurent de desloger, ils laisserent dedans la maison un petit enfant
dormant au berceau. Ces hostes, c'est-a-dire les diables, commencent a
remuer les tables, a hurler, a regarder par les fenestres, en forme d'ours,
de loups, de chats, d'hommes terribles, tenans es pattes des verres pleins
de vin, des poissons, de la chair rostie et bouillie. Comme les voisins, le
gentilhomme, le pasteur et autres contemployent en grand frayeur un tel
spectacle, le pauvre pere commence a crier: Helas, ou est mon enfant! Il
avoit encore le dernier mot en la bouche, quand un de ces hostes noirs
apporte en ses bras l'enfant aux fenestres et le monstre a tous ceux qui
estoyent en rue. Le gentil-homme tout esperdu, se prend a dire a celui de
ses serviteurs auquel il se fioit le plus: Mon ami, que feroi-je? Monsieur,
repond le serviteur, je remettrai et recommanderai ma vie a Dieu, puis au
nom d'icelui j'entrerai dans la maison, d'ou moyennant sa faveur et son
secours, je vous rapporteray l'enfant. A la bonne heure, dit le maistre,
Dieu t'accompagne, t'assiste et fortifie. Le serviteur ayant receu la
benediction du pasteur et d'autres gens de bien qui l'accompagnoyent, entre
au logis, et aprochant du poisle ou estoyent ces hostes tenebreux, se
prosterne a genoux, se recommande a Dieu, puis ouvre la porte, et void les
diables en horrible forme, les uns assis, les autres debout, aucuns se
pourmenans, autres rampans contre le planche, qui tous accourent a lui
crians ensemble: _Hui, hui_, que viens-tu faire ceans? Le serviteur suant
de destresse, et neantmoins fortifie de Dieu, s'adresse au malin qui tenoit
l'enfant, et lui dit: Ca, baille moy cest enfant. Non feray, repond
l'autre: il est mien. Va dire a ton maistre, qu'il viene le recevoir. Le
serviteur insiste, et dit: Je fai la charge que Dieu m'a commise, et scai
que tout ce que je fai selon icelle lui est agreable. Pourtant a l'esgard
de mon office, au nom, en l'assistance et vertu de Jesus-Christ, je
t'arrache et saisi cest enfant, lequel je reporte a son pere. Ce disant, il
empoigne l'enfant, puis le serre estroittement en ses bras. Les hostes
noirs ne respondent que cris effroyables et ces mots: _Hui_ meschant, _hui_
garnement, laisse, laisse cest enfant: autrement nous te despecerons. Mais
lui mesprisant leurs menaces sortit sain et sauf, et rendit l'enfant de
mesmes es mains du gentil-homme son pere. Quelques jours apres to
|