uteur d'un
homme, et tout soudain rejettees contre terre. Or comme quelques-uns de
leurs amis jusques au nombre de treize fussent entrez en ce couvent pour
resjouir celles qui sembloyent soulagees et presque gueries, les unes
tomberent incontinent a la renverse hors de la table ou elles estoyent,
sans pouvoir parler, ni conoistre personne, les autres demeurerent
estendues comme mortes, bras et jambes renversees. Une d'entre elles fut
soulevee en l'air, et quoi que les assistans s'efforcassent l'empescher et
y missent la main, toutes fois elle leur estoit arrachee maugre eux, puis
tellement rejettee contre terre qu'elle sembloit morte. Mais se relevant
puis apres, comme d'un somme profond, elle sortoit du refectoir n'ayant
aucun mal. Les unes marchoyent sur le devant des jambes, comme si elles
n'eussent point eu de pieds, et sembloit qu'on les trainast par derriere,
comme dedans un sac deslie. Les autres grimpoyent au faiste des arbres
comme des chats, et en descendoyent a l'aise du corps. Il advint aussi
comme leur abbesse parloit a madame Marguerite, comtesse de Bure, qu'on lui
pinca fort rudement la cuisse, comme si la piece en eust este emportee,
dont elle s'ecria fort. Portee incontinent en son lict, la playe fut veue
livide et noire, dont toutes fois elle guerit. Cette bourrellerie de
nonnains dura trois ans a descouvert, depuis on tint cela cache.
"Ce qui advint jadis aux nonnains de Brigitte en leur couvent pres de
Xante, convient a ce que nous venons de reciter. Maintenant elles
tressailloyent ou beeloyent comme brebis, ou faisoyent des cris horribles.
Quelques fois elles estoyent poussees hors de leurs chaires au temple ou la
mesmes on leur attachoit la voile dessus la teste: et quelques fois leur
gavion estoit tellement estouppe qu'impossible leur estoit d'avaler aucune
viande. Ceste estrange calamite dura l'espace de dix ans en quelques-unes.
Et disoit-on qu'une jeune nonnain, esprise de l'amour d'un jeune homme en
estoit cause, pour ce que ses parens le lui avoyent refuse en mariage. Et
que le diable prenant la forme de ce jeune homme s'estoit monstre a elle en
ses plus ardentes chaleurs, et lui avoit conseille de se rendre nonnain,
comme elle fit incontinent. Enfermee au couvent, elle devint comme furieuse
et monstra a chacun des horribles et estranges spectacles. Ce mal se glissa
comme une peste en plusieurs autres nonnains. Cette premiere sequestree
s'abandonna a celui qui la gardoit et en eust deux enfans
|