tate Leodiensi.
In reuertendo igitur venitur ab hac insula per prouincias magnas Imperij
Tartarorum, in quibus semper noua, semper mira, imo nonnunquam incredibilia
viator potest videre, percipere, et audire.
Et Noueritis, vt praedixi, me pauca eorum vidisse, quae in terris sunt
mirabilium, sed nec hic scripsisse centessimam partem eorum quae vidi, quod
nec omnia memoriae commendare potui, et de commendatis multa subticui,
propter modestiam, quam decet omnibus actibus addi.
Idcirco vt et alijs, qui vel ante me in partibus illis steterunt, vel ituri
sunt, maneat locus narrandi siue scribendi, modum huius pono tractatus,
potius decurtans quam complens, quoniam alias loquendi non esset finis, nec
aures implerentur auditu.
[Sidenote: Concludit opus suum.] Itaque anno a natiuitate Domini nostri
Iesu Christi 1355. in patriando, cum ad nobilem Legiae, seu Leodij ciuitatem
peruenissem, et prae grandeuitate ac artericis guttis illic decumberem in
vico qui dicitur, Bassessanemi, consului causa conualescendi aliquos
medicos ciuitatis: Et accidit, Dei nutu, vnum intrare physicum super alios
aetate simul et canicie venerandum, ac in sua arte euidenter expertum, qui
ibidem dicebatur communiter, Magister Ioannes ad barbam.
Is, dum pariter colloqueremur, interseruit aliquid dictis, per quod tandem
nostra inuicem renouabatur antiqua notitia, quam quondam habueramus in Cayr
Aegypti apud Melech Mandibron Soldanum, prout supra tetigi in 7. capitulo
libri.
Qui cum in me experientiam artis suae excellenter monstrasset, adhortabatur
ac praecabatur instanter, vt de hijs quae videram tempore peregrinationis,
et itinerationis meae per mundum, aliquid digererem in scriptis ad legendum,
et audiendum pro vtilitate.
Sicque tandem illius monitu et adiutorio, compositus est iste tractatus, de
quo certe nil scribere proposueram, donec saltem ad partes proprias in
Anglia peruenissem. [Sidenote: Edwardus tertius.] Et credo praemissa circa
me, per prouidentiam et gratiam Dei contigisse, quoniam a tempore quo
recessi, duo reges nostri Angliae, et Franciae, non cessauerunt inuicem
exercere destructiones, depraedationes, insidias, et interfectiones, inter
quas, nisi a Domino custoditus, non transissem sine morte, vel mortis
periculo, et sine criminum grandi cumulo. Et ecce nunc egressionis meae anno
33. constitutus in Leodij ciuitate, quae a mari Angliae distat solum per duas
diaetas, audio dictas Dominorum inimicitias, per gartiam Dei consopita
|