eillasmes avec trois navires, Scavoir la grand
Hermine du port, environ cent a six vingtz tonneaulz, ou estoit le
cappitaine general, & pour maistre Thomas frosmond, Claude du pond
briand, filz du seigneur de Montreueil & eschansson de monseigneur le
Daulphin, Charles de la Pommeraye, Jehan poullet & autres gentizlhommes.
Le second navire, nomme la petite Hermine du port, environ soixante
tonneaulz; Estoit cappitaine soubz le dict cartier Mace jalobert, &
maistre Guillaume le marie. Et au tiers navire nomme l'Emerillon du port
de environ quarante tonneaulz, en estoit cappitaine Guillaume le breton,
& maistre Jacques maingart. Et navigasmes avec bon temps jusques au 20,
jour dudict moys de May, que le temps se tourna en yre & tourmente, qui
nous a dure en ventz contraire & serraisons, autant que navires qui
passassent jamais la mer, eussent sans amendement: Tellement que le
vingt cinqiesme jour de Juing par le dict mauvais temps & serraison,
nous entreperdismes tous trois, sans que nous ayons eu nouvelles les
ungs des autres jusques a la terre neufve; la ou nous avions lymite nous
trouver tous en ensemble, & depuis nous estre entreperduz, avons este
avec la nef generalle par la mer de tous ventz contraires, jusques au
septiesme jour du moys de Juillet, que nous arrivasmes a la dicte terre,
neufve, & prismes terre a l'isle aux oyseaulx: laquelle est a quatorze
lieues de la grand terre, quelle ysle est si tresplaine d'oyseaulx, que
tous les navires de France y pourraient facilement charger, sans que on
s'apperceust que l'on en eust tire, & la en prinsmes deux barques pour
partie de noz victailles: Icelle ysle est en leslevation du pole en. 49
degrez, 40 mynutes. Et le huictiesme dudict moys, nous appareillasmes
de ladicte ysle, & avec bon temps vinsmes au hable du blanc [Page 7]
sablon estant a labbaye des chasteaulx le XVe jour dudict moys, qui
est le lieu ou nous debuoyns rendre: Auquel lieu feusmes attendans noz
compaignons jusques au vingt sixiesme dudict moys, lequel jour ilz
arrriverent tous deux ensemble: Et la nous acoustrasmes & prismes eaues,
boys & aultres choses necessaires, & appareillasmes & feismes voylle
pour passer oultre le vingt neufiesme jour dudict moys a l'aube du jour,
& feismes porter le long de la coste du Nort Gisant, est Nordest, &
Ornaist, Surnaist jusques environ les huict heures de soir que meismes
les voylles bas, le travers de deux ysles qui l'avancent plus hors
que les autres que nous nommasm
|