nos dictz navires, nonobstant qu'ilz en feussent plusieurs fois
priez: dequoy eusmes aucune deffiance d'eulx. Le cappitaine leur demanda
s'ilz vouloient aller comme ilz luy avoient promis avec lui a Hochelaga,
& ilz respondirent que oy: & qu'ilz estoient deliberez y aller: lors
chascun se retira.
Le lendemain 15, ledict cappitaine feust a terre avec plusieurs pour
faire planter ballises & merches pour plus seurement mettre les navires
a sauvete. Auquel lieu se rendirent au-devant de nous plusieurs gens
du pays & entre aultre le dict Donnacona noz deux hommes & leur bande,
lesquelz se tindrent apart soubz une poincte de terre qui est sur le
bort d'ung fleuve, sans ce que aucun d'eulx vint environ nous, comme les
aultres qui n'estoient de leur bande faisoient. Apres que le cappitaine
fut adverty qu'ilz y estoient, commanda a partie de ses gens aller
avecques luy, & furent vers eulx soubz ladicte pointe, & trouverent les
dictz Donnacona, Taignoagny, Dom agaya & plusieurs aultres: & apres
se estre entre saluez, se avanca ledict Taignoagny de parler, & dit
a nostre cappitaine que ledict seigneur Donnacona estoit marry, dont
ledict cappitaine & ses gens portoient tant de batons de guerre, par
ce que de leur part n'en portoient nulz. A quoy leur respondist ledict
cappitaine que pour leur marrisson ne laisserons a les porter, & que
c'estoit la coustume de France, & qu'il le scavoit bien, mais pour
toutes leurs parolles ne laisserent le dict cappitaine & Donnacona
a faire grand chere ensemble. Lors aperceusmes que ce que disoit le
Taignoagny ne venoit que de luy & son compaignon. Et avant de partir
dudict lieu, lesdictz Donnacona & cappitaine feirent une [Page 16]
asseurance de sorte merveilleuse, car tout le peuple dudict seigneur
Donnacona gecterent & feirent trois cris a plaine voix, que cestoit
chose horrible a ouyr, & a tant prindrent congie les ungs des aultres, &
nous retirasmes a bort pour celuy jour, & le lendemain 16, dudict moys
nous meismes les deux plus grandz navires dedens ledict hable & riviere,
ou il y a de plaine mer trois brasses & de bas d'eaue demy brasse, & fut
laisse le gallyon dedens la radde pour mener au dict Hochelaga. Et tout
incontinent que lesdictes navires furent audict hable & asseur, se
trouverent devant les dictes navires Donnacona, Taignoagny, Domagaya, &
plus de cinq cens personnes hommes, femmes, que petis enfans, et entra
ledict seigneur avec dix ou douze des plus grandz personnaiges du pays
|