nuict tendans aller a Honguedo leur mener la
guerre, avec environ deux cens personnes tant hommes femmes qu'enfans.
Lesquelz furent surprins en dormant dedans ung fort, qu'ilz avoient
faict, ou misrent lesdictz Trudamans le feu tout a l'entour & comme ilz
sortoient les tuerent tous reserve cinq qui eschapperent. De laquelle
destrousse se plaignoient encores fort, nous monstrant qu'ilz en
auroient vengeance. Apres lesquelles choses, nous reterasmes a noz
navires.

_De la facon de vivre du peuple de la dicte terre, & de certaines
conditions creance & facon de faire qu'ilz ont_.

Cedict peuple n'a aucune creance de Dieu, car ilz croient a ung qu'ilz
appellent Cudragny, & disent qu'ilz parlent souvent a eulx & leur dict
le temps qu'il doibt faire. Ilz disent aussi quand il se [Page 30]
courouce a eulx, qu'il leur gecte de la terre aux yeulx. Ilz croyent
aussi quand ilz tespassent, qu'ilz vont es estoilles, puis viennent
baissans en lorrizon comme les dictes estoilles. Et s'envont en beaulx
champs, vers plains de beaulx arbres, fleurs & fruictz sumptueux. Apres
qu'ilz nous eurent donne le tout a entendre, nous leur avons remonstre
leur erreur, & dict que leur Cudragny est ung mauvais esperit, qui les
abuse & dict qu'il n'est que ung Dieu, qui est au ciel, lequel nous
donne toutes choses necessaires, & est createur de toutes choses & que
cestuy debvons croire seulement, & qu'il fault estre baptisez, ou aller
en enfer, & leur feust remonstre plusieurs aultres choses de nostre foy.
Ce que facilement ilz ont creu, & appelle leur Cudragny, Agouionda,
tellement que plusieurs fois ont prie nostre cappitaine les faire
baptiser, & y sont venuz ledict seigneur Taignoagny, Dom agaya, &
tout le peuple de leur ville pour le cuyder estre: mais par ce que
ne scavions leur intention & couraige, & qu'il n'y avoit qui leur
remonstrant la foy pour lors, feust prins excuse vers eulx. Et dict a
Taignoagny & Dom agaya, qu'ilz leur feissent entendre que retourneryons
ung aultre voyage, & apporterions des prestres & du cresme, leur donnant
a entendre pour excuse, que lon ne peult baptiser sans ledict cresme, Ce
qui croient, par ce que plusieurs enfans ont veu baptiser en Bretaigne.
Et de la promesse que leur fust faicte de retourner furent tresjoyeulx.

Cedict peuple vit en communaulte de biens assez de la sorte des
Brisilans, & sont vestus de peaulx de bestes sauvaiges, & assez
povrement. L'yver ilz sont chaulsez de chausses & soulliez qu'ilz