et mortifie &
s'estoit retire tout son sang au dessus de son coeur. Car quand il fut
ouvert sortist au dessus du coeur grand habondance de sang noir infect.
Pareillement avoit la ratte par devers l'eschine ung peu entamee environ
deux doidz comme si elle euct este frotee sur une pierre rude. Apres
cela veu, luy feust ouverte & incise une cuisse, laquelle estoit fort
noyre par dehors, mais dedans la chair fut trouvee assez belle. Ce
faict, fut inhume a mieulx que lon peust. Dieu par sa saincte grace
pardonne a son ame, & a tous trespassez, Amen. [Page 36]
Et depuis de jour en aultre s'est tellement continuee ladicte maladie,
que telle heure a este, que par tous les trois navires ny avoit pas
trois hommes sains, de sorte qu'en l'ung desdictz navires n'y avoit
homme qui eust peu descendre soubz le tillac pour tirer a boire,
tant pour luy que pour son compaignon. Et pour l'heure y en avoit ja
plusieurs de mortz. Lesquelz il nous convint mettre par par foiblesse
soubz les neiges: car il ne nous estoit possible de povoir pour lors
ouvrir la terre qui estoit gellee tant estions foibles, & avyons peu de
puissance. Et si estions en une crainte merveilleuse des gens du pays
qu'ilz ne se apperceussent de nostre pitie & foiblesse. Et pour couvrir
ladicte maladie lors qu'ilz venoient pres nostre fort nostre cappitaine
que Dieu a tousjours preserve, debout sortoit au devant d'eulx avec deux
ou trois hommes, tant sains que malades. Lesquelz faisoit sortir apres
luy. Et lors qu'il les voyoit hors du fort, faisoit semblant les vouloir
battre en criant & leur gectant bastons apres eulx, les envoyant a bort
monstrant par signes esdictz sauvages qu'il faisoit besongner tous ses
gens dedans les navires les ungs a gallefestrer, les aultres a faire
du pain & aultres besongnes, & qu'il ne estroit pas bon qu'ilz vinsent
donner de hors. Ce qu'ilz croyent, & faisoit ledict cappitaine battre &
mener bruict esdictz malades dedans les navires avec bastons & caillousz
faignans callefestrer. Et pour lors estions si esprins de ladicte
maladie que avions quasi perdu l'esperance de jamais retourner en France
si Dieu par sa bonte infinie & misericorde ne nous eust regarde en
pitie & donne congnoissance d'ung remede contre toutes maladies le plus
excellent qui fut jamais veu ny trouve sur la terre, ainsi qu'il sera
faict mention en ce chapitre.
_Le nombre de temps que nous avons este au hable saincte Croix & places
dedans les glaces & neiges, & le no
|