l reviendroit dedans dix ou douze lunes:
& que le Roy luy feroit ung grand present: de quoy feust fort joyeulx
ledict Donnacona, & le dist es autres en parlant a eulx lesquelz en
feirent trois merveilleux crys, en signe de joye. Et a l'heure
feirent ledict peuple & Donnacona entre eulx plusieurs predications &
preschemens: lesquelz il n'est possible d'entendre par faulte de langue:
nostre cappitaine dist audict donnacona qu'ilz vissent seurement de
l'autre bort pour mieulx parler ensemble, & qu'il les asseuroit, ce
que leur dist ledict Donnacona: & sur ce vindrent une barquee des
principaulx a bort desdictes navires. Lesquelz de rechief commencerent
plusieurs preschemens, donnant louange audict cappitaine; & luy feirent
present de vingt quatre colliers de Esurgny, qui est la plus grand
richesse qu'ilz ayent en ce monde: Car ilz l'estiment plus que or &
argent. Apres qu'ilz eurent assez parlemente & devise les ungs avec les
aultres, & veu qu'il n'y avoit remede audict seigneur d'eschapper &
qu'il failloit qu'il veint en France, Il commanda que on luy apportast
le lendemain vivres pour menger par la mer. Nostre cappitaine feist
present audict Donnacona de deux paisles d'arain & de huict hachotz, &
autres menues besongnes comme cousteaulx, & patenostres. Dequoy fut fort
joyeulx en sou semblant: Et les envoya ledict cappitaine a ceulx qui
estoyent venuz parler audict Donnacona, aucuns petis presens; Dequoy
remercierent fort ledict cappitaine. A tant se retyrerent & s'en
allerent a leurs logis. [Page 44]

_Comment le lendemain cinquiesme jour de May, ledict peuple retourna
parler a leur seigneur, & comment il veint quatre femmes a bort luy
apporter des vivres_.

Le cinquiesme jour dudict moys au plus matin, ledict peuple retourna
en grand nombre, pour parler a leur seigneur, & envoyerent une barque,
qu'ilz appellent en leur langaige Casnouy, en laquelle ilz estoient
quatre femmes, sans y avoir aucuns hommes, pour doubte qu'ilz avoient
qu'on ne les retint: lesquelles apporterent force vivres, scavoir gros
mil (qui est le bled duquel ilz vivent) chair, poisson, & aultres
provisions a leur mode. Lesquelles estre arrivees es navires, le
cappitaine leur feist bon recueil, & pria Donnacona audict cappitaine
qu'il dist ausdictes femmes, que dedans douze lunes il retourneroit, &
qu'il admeneroit ledict Donnacona a Canada: Ce disoit a celle fin de les
contenter: Ce que feist ledict cappitaine, dont lesdictes femmes feirent
grand