semblant de joye, en montrant par signes & parolles audict
cappitaine, mais qu'il retournast & admenast ledict Donnacona qu'ilz
lui feroient plusieurs presens. Lors chascune dicelles donna audict
cappitaine ung collier desurgny, puis s'en allerent de l'autre bort de
la riviere ou estoit le peuple dudict Stadacone, & se retirerent prenant
congie dudict seigneur.
Le samedy sixiesme jour dudict moys, nous appareillasmes du havre
saincte Croix, & vinsmes a l'ysle es Couldres, ou avons este jusques au
seziesme dudict moys, laissant amortir les eaues, lesquelles estoient
trop courantes & dangereuses pour avaller ledict fleuve; et attendans
bon temps. Pendent lequel temps vindrent plusieurs barques des peuples
subjectz audict Donnacona lesquelz venoient de la riviere du Saguenay:
Et lors que par Dom Agaya furent advertiz de la prinse de eulx, &
la facon & maniere comme on menoit Donnacona en France, furent bien
estonnez mais ne laisserent a venir le long des navires, parler audict
Donnacona, qui leur dist que dedans douze lunes il retourneroit, & qu'il
avoit bon traictement avec le cappitaine & compaignons, dequoy a une
voix remercierent ledict cappitaine, & donnerent audict Donnacona trois
pacquetz de peaulx de byevres & loups marins avec un grand cousteau
de cuyvre rouge, qui vient du Saguenay & autres choses. Semblablement
donnerent audict cappitaine ung collier Desurgny, pour [Page 45]
lesquelz presens leur feist ledict cappitaine donner dix ou douze
hachotz, desquelz furent fort contens & joyeulx, & en remercierent
ledict cappitaine.
Le lendemain, 16e jour dudict moys de May nous appareillasmes de ladicte
ysle es couldres, & veinsmes poser a une ysle qui est a environ quinze
lieues de ladicte ysle es couldres, laquelle est grande d'environ
cinq lieues de long, & la passasmes celluy jour pour passer la nuict,
esperant le lendemain passer les dangier du Saguenay, lesquelz sont
grandz. Le soir feusmes a ladicte ysle, ou trouvasmes grand nombre de
lievres, desquelz eusmes quantite: & par ce la nommasmes l'ysle es
lievres. Et la nuict le vent vint contraire & en tourmente tellement
qu'il convint relacher a l'isle es couldres dont estions partis, par
ce qu'il n'y avoit autre passage entre lesdictes ysles. Et y feusmes
jusques au 21 dudict moys que le vent vint bon, & tant feismes par noz
journees que passasmes jusques a Honguedo, lequel passage n'avoit par cy
devant este descouvert. Et feismes courir le travers du Cap de Pr
|