e retirent dedans le boys dire les nouvelles aux aultres,
qui sortirent dudict boys tout incontinent faignans estre joyeulx
desdictes parolles par ledict cappitaine ainsi dictes. Et pour monstrer
qu'ilz en estoient joyeulx, tous incontinent qu'ilz furent devant les
navires commencerent d'une commune voix a faire trois criz & hurlemens,
qui est leur signe de joye, & se prindrent a danser & chanter, comme
avoient de coustume: mais pour resolution lesdictz Taignoagny & Dom
agaya dirent a nostre dict cappitaine, que le dict seigneur Donnacona
ne vouloit point que nul d'eulx allast a Hochelaga avec luy, S'il
ne bailloit plege qui demourast a terre avec ledict Donnacona. Le
cappitaine leur respondist que s'ilz n'estoient deliberez y aller de bon
couraige qu'ilz demourassent, & que par eulx ne laisseroit mettre paine
y aller.

_Comment nostre cappitaine & tous les gentilz hommes avec cinquante
hommes mariniers partirent de la province de Canada avec le gallyon, &
les deux barques, pour aller a Hochelaga, & de ce que fut veu entre deux
sur ledict fleuve_.

Le lendemain, 19e jour dudict moys de Septembre, nous appareillasmes &
feismes voylle avec le dict gallyon & les deux barques, pour aller avec
la maree amont ledict fleuve, ou trouvasmes a veoir des deux costez
d'icelluy les plus belles & meilleures terres, qu'il soit possible de
veoir. Aussi vives que l'eaue plaine des beaulx arbres du monde: & tant
de vignes chargez de raisins le long dudict fleuve, qu'il semble mieulx
qu'elles ayent este plantez de main d'homme que aultrement: mais par ce
qu'elles ne sont cultivez ne taillez, ne sont les raisins si [Page 20]
groz & si doulx que les nostres: pareillement trouvasmes beaucoup de
maisons sur ledict fleuve, le lesquelles sont habitees de gens qui
font grande pescherie de tous poissons: lesquelles gens venoient a noz
navires d'aussi grand amour & privaulte, que si eussions este du pays,
Nous apportant force poisson, & de ce qu'ilz avoient pour avoir de
nostre marchandise tendans les mains au ciel, & faisans plusieurs signes
de joye. Et nous estans posez environ ving cinq lieues de Canada en ung
lieu nomme Ochelay, qui est ung destroict dudict fleuve fort courant
& dangereux, tant de pierres que d'aultres choses vindrent plusieurs
barques a bort, Et entre aultres, y vint ung grand seigneur du pays,
lequel faisoit un grand sermon en venant & arrivant a bort, monstrant
par signes evidens avec les mains & aultres cerimonies, que