couple de cousteaulx, avec une croix, qu'il luy feist baiser, & la
luy pendit au col: de quoy rendit graces audict cappitaine. Ce faict
marchasmes plus oultre: & environ demye lieue de la, commencasmes a
trouver les terres labourees & belles grandes champaignes plaines de
bledz de leur terre, qui est comme mil de bresil, aussy gros ou plus que
poix, dequoy vivent ainsi, comme nous faisons de fourment: & au parmy
d'icelles champaignes est situee la ville de Hochelaga, pres & joignant
une montaigne qui est a lentour d'icelle, labouree & fort fertile: de
dessus laquelle on veoit fort loing. Nous nommasmes la dicte montaigne
le mont Royal. La dicte ville est toute ronde, & close de boys a trois
rencqs, en facon d'une piramide, croisee par le hault, ayant la rengee
du parmy en facon de ligne perpendiculaire: puis rengee de boys couchez
de long, bien joinctz & cousus a leur mode: Et est de haulteurs environ
deux lances, n'y a en icelle ville que une porte & entree, qui ferme
a barres. Sur laquelle & en plusieurs endroictz de ladicte [Page 24]
closture, y a manieres de galleries, & eschelles a y monter qui sont
garnis de roches & chaillouz. Pour la garde & deffence d'icelle, il y
a dedans icelle ville, environ cinquante maisons longues d'environ
cinquante pas ou plus chascune, & douze ou quinze pas de larges, &
toutes faictes de boys couvertes & garnyes de grandes escorces
& pelleures desdictz boys aussy large que tables, bien cousus
artificiellement selon leur mode: & par dedans icelles y a plusieurs
estres & chambres: Et au meilleu d'icelles maisons y a une grande place
par terre ou font leur feu, y vivent en communaulte, puis se retirent
en leur dictes chambres les hommes avecques leurs femmes & enfans.
Pareillement ilz ont grenyers au hault de leurs maisons, ou ilz mettent
leur bled dequoy font leur pain, qu'ilz appellent Carraconny, Et le font
en la sorte cy apres: Ilz ont des pilles de boys comme a piller chanure,
& bastent avec pillons de boys le dict bled en pouldre, puis le massent
en paste, & en font tourteaulx qu'ilz metent sur une pierre large qui
est chaulde, puis le couvrent de cailloudz chauldz. Et ainsi cuysent
leur pain en lieu de four. Ilz fond pareillement force potaiges dudict
bled & de febves et poix, desquelz ilz ont assez & aussy grosses
concombres & aultres fruictz. Ilz ont de grandz vaisseaulx comme thonnes
en leurs maisons ou ilz mettent leur poisson, lequel ilz sechent a la
fumee durant l'este & en vi
|