, de quoy eurent grosses parolles lesdictz
Taignoagny & Dom agaya. Lors aperceusmes que ledict Taignoagny ne
valloit riens, & qu'il ne songeoit que trahison & malice tant par ce
que aultres mauvais tours que luy avions veu faire. Et sur ce ledict
cappitaine feist mettre lesdictz enfans dedans les navires, feist
apporter deux espees, ung grand bassin d'arain plain, & ung ouvre pour
laver mains, & en feist present audict Donnacona, lequel fort s'en
contenta & remercia nostre cappitaine, Et commanda ledict Donnacona
a tous ses gens chanter & danser, & pria ledict Donnacona nostre
cappitaine faire tirer une piece d'artillerie, par ce que lesdictz
Taignoagny & Dom agaya lui en avoient faict teste, & aussi que jamais
n'en avoient veu, ny ouy. A quoy le cappitaine respondist qu'il le
vouloit bien, & commanda que on tirast une douzaine de barges avec leurs
boulletz le travers du boys qui estoit jouxte lesdictes navires & gens.
Dequoy furent tous si estonnez qu'ilz pensoient que le ciel feust cheu
sur eulx, & Ce prindrent a hucher & hurler si tres fort, que sembloit
que enfer y feust vuide, & davant qu'ilz se retirassent, le dict
Taignoagny feist dire par interposes personnes, que les compaignons du
gallyon, lequel estoit demoure ae la radde, avoient tue deux de leurs
gens de coups d'artillerie: dont tous se retirerent a grand haste, ainsi
que si les eussions voulu tuer. Ce que ne se trouva verite: Car durant
ledict jour ne fut dudict gallyon tire artillerie.

_Comment lesdictz Donnacona, Taignoagny, & aultres songerent une
finesse, & feirent habiller trois hommes en guise de diables, faignans
estre venuz de par Cudriagny leur dieu pour nous empescher d'aller
audict Hochelaga_. [Page 18]

Le lendemain. 18. dudict moys pour nous cuyder tousjours empescher
d'aller a Hochelaga, songerent une grand finesse qui feust telle, ilz
habillerent trois hommes en la facon de trois diables, lesquelz avoient
cornes aussi longues que le bras, & estoient vestus de peaulx de chien
noirs & blancs. Et avoient le visaige painct aussi noir que charbon, &
les feirent mettre dedans une de leurs barques a nostre non sceu; &
leur bande vint comme ilz avoient de coustume au prez de noz navires,
lesquelz se tindrent dedans le boys sans apparoistre environ deux
heures, attendant que l'heure & maree fut venue pour l'arrivee de
la dicte barque, a la quelle heure sortirent tous du boys, & se
presenterent devant lesdictes navires sans eulx approcher ainsi
q