,
lesquelz furent par ledict cappitaine & autres festoyes, & leur
fut donne aucuns petis presens, & fut par Taignoagny dict a nostre
cappitaine, que ledict seigneur estoit marry dont il alloit a Hochelaga,
& que ledict seigneur ne vouloit que luy que ploit y allast par ce que
la riviere ne valloit riens, & leur fust respondu par ledict cappitaine
que pour tout ce ne laisseroit y aller s'il luy estoit possible; par ce
qu'il avoit commandement du roy son maistre de aller le plus avant qu'il
pourroit: mais si le dict Taignoagny y voulant aller comme il avoit
promis, qu'on luy feroit present, dequoy il seroit content & grand
chere, & qu'ilz ne feroient que aller & venir seulement audict
Hochelaga, puis retourner. A quoy respondist le dit Taignoagny, qu'il
n'y yroit point. Lors se retirerent a leurs maisons. Et le lendemain, l7
dudict moys, le dict Donnacona & les aultres revindrent comme devant, &
apporterent force anguilles & aultres poissons, dequoy se faict grand
pescherie audict fleuve, comme sera cy apres dict. Lors qu'ilz furent
arrivez devant lesdictes navires, commencerent a chanter & danser comme
avoient de coustume. Et apres qu'ilz eurent ce faict, feict ledict
Donnacona mettre tous ses gens d'ung coste, & feist ung cerne sur le
sable, & y feist mettre nostre cappitaine & ses gens: & lors commenca
une harengue, tenant une fille d'environ l'aage de dix a douze ans en
l'une de ses mains, puis la vint presenter a nostre cappitaine, & tout
incontinent tous les gens dudict seigneur se prindrent a faire trois
criz & hurlemens en signe de joye & alliance. Puis de rechef presenta
deux petis garsons de moindre aage l'un apres l'aultre, desquelz feirent
telz criz & cerimonies que devant. Duquel present ainsi faict par
le dict seigneur fut par nostre cappitaine remercie. Lors [Page 17]
Taignoagny dict au cappitaine que la fille estoit la propre fille de la
seur dudict seigneur, & l'ung des garsons frere de luy qui parloit, Et
qu'on les luy donnoit sur l'intention qu'il n'allast point a Hochelaga.
A quoy luy re respondist nostre cappitaine, que si on les luy avoit
donnez sur ceste intention, que on les reprint, & que pour riens ne
laisseroit y aller par ce qu'il avoit commandement de ce faire. Sur les
quelles parolles Dom agaya compaignon dudict Taignoagny, dict audict
cappitaine que ledict seigneur luy avoit donne les dictz enfans par
bonne amour, & en signe d'asseurance, & qu'il estoit content aller
avec luy audict Hochelaga