sance leur donna
aucuns petis presens de peu de valleur, de quoy se contenterent fort.
Le lendemain le seigneur de Canada nomme Donnacona en nom, & l'appellent
pour seigneur Agouhanna, vint avecques douze barques accompaigne de
plusieurs gens davant noz navires. Puis enfeist retirer arriere dix, &
vint seulement avec deux a bort desdictz navires, accompaigne de seize
hommes, & commenca ledict Agouhanna le travers du plus petit de noz
trois navires a faire une predication & preschement a leur mode, en
demenant son corps & membres d'une merveilleuse sorte, qui este une
cerimonie de joye & asseurance, Et lors qu'il fut arrive a la nef
generalle ou estoient les dictz Taignoagny & son compaignon, parla le
dict seigneur a eulx, & eulx a luy, & luy commencerent a compter ce
qu'ilz avoient veu en France, & le bon traictement qu'il leur avoit este
faict, dequoy tut fort joyeulx, & pria nostre cappitaine luy bailler
ses bras pour les baiser & accoller qui est leur mode de faire chere en
ladicte terre. Lors nostre cappitaine entra en la dicte barque du dict
Agouhanna, & commanda apporter pain & vin pour faire boire & menger
ledict seigneur & sa bande, ce qui fut faict, dequoy furent fort
contens. Et pour lors ne fut aultre present faict audict seigneur
attendant lieu & temps. Apres lesquelles choses ainsi faictes, se
departirent les ungs des aultres, & prindrent conge, & se retira le dict
Agouhanna en ses barques pour se retirer & aller en son lieu. Et feist
le dict cappitaine apprester ses barques pour passer oultre, & aller
avant le dict fleuve avec le flo, pour cercher hable & lieu de sauvete
pour mettre les navires, & feusmes oultre le dict fleuve environ dix
lieues coustoyant la dicte ysle. Et au bort d'icelles trouvasmes ung
asseurg d'eaulx fort beau & plaisant. Au quel lieu y a une petitie
riviere & hable de barre marinant de deux a trois brasses, que [Page 14]
trouvasmes lieu a nous propice pour mettre nosdictes navires a sauvete.
Nous nommasmes le dict lieu saincte Croix, par ce que le dict jour y
arrivasmes. Aupres d'iceluy lieu y a ung peuple, dont est seigneur le
dict Donnacona, & y est la demeurance qui se nomme Stadacone, qui est
aussi bonne terre qu'il soit possible de veoir & bien fructiferente,
pleine de fort beaulx arbres de la nature & sorte de France. Comme
chesnes, ormes, fresnes, noyers, yfz, cedres, vignes, aubespines, qui
portent le fruict aussi gros que prunes de damas, & aultres arbres:
soubz les quels c
|