merche. Et fault amener la dicte croix
au Nordest, puis l'aller querir & la laisser de tribort, & trouverez
de perfond six brasses, & se fault donner garde de deux basses qui
demeurent des deux costez a demye lieue hors. Toute ceste dicte coste
est fort dangereuse & plaine de basses: nonobstant qu'il semble y avoir
plusieurs bons hables n'y a que basses & plateys. Nous feusmes au dict
hable depuis le dict jour jusques au Dimenche vii deg. jour d'Aoust: Auquel
jour appareillasmes & vinsmes querir la terre deca vers le cap de
Rabast, qui est distant du dict hable, environ xx lieues Gisans Nort
Nordest & Susur Onaist. Et le lendemain le vent vint contraire: Et parce
que ne trouvasmes nulz hables a la dicte terre de Su. feismes porter
vers le Nort oultre le precedent hable de environ dix lieues, ou nous
trouvasmes une moult belle & grande baye, plaine d'ysles & bonnes
entrees & passaige de tous les ventz qu'il scavoit faire: Et pour
congnoissance d'icelle baye y a une grand ysle comme ung cap de terre,
qui s'avance plus hors que les autres; Et sur la terre environ deux
lieues, y a une montaigne faicte comme ung tas de bled, nous nommasmes
la dicte baye la baye sainct Laurens.

Le douziesme jour du dict moys nous partismes de la dicte baye sainct
Laurens & feismes porter a Onaist, & vinsmes querir ung cap de terre
devers le Su qui gist environ l'Onaist ung cart de Sur Onaist du
dict hable Sainct Laurens environ vingt cinq lieues. Et par les deux
sauvaiges que avions prins le premier voyage, nous fut dict que cestoit
de la dicte terre devers le Su, & que cestoit une ysle, & que par le Su
d'icelle estoit le chemin a aller de Honguedo ou nous les avions prins
lan precedent a Canada: Et que a deux journees du dict cap & ysle
commenceroit le royaulme de Saguenay a la terre devers le Nort allant
vers le dict Canada, le travers du dict cap environ trois [Page 9]
lieues y a de profond cent brasses & plus. Et n'est memoire de jamais
avoir tant veu de ballaynes que nous vismes celle journee le travers
dudict cap.

Le lendemain jour nostredame d'Aoust quinziesme dudict moys, nous
passasmes le destroict la nuict de devant, & le lendemain eusmes
congnoissance de terres qui nous demouroient vers le Su: qui est une
terre a haultes montaignes a merveilles, Donc le cap susdict de la dicte
ysle que nous avons nommee l'ysle de l'Assumption, & ung cap de dictes
haultes terres gisent Est Nordest & Onaist sur Onaist, & y a entre eulx
vingt cin