bona valde_, quamvis ea quietus feceris, _requievisti septimo die_, hoc
praeloquatur nobis vox Libri tui, quod et nos post opera nostra, ideo bona
valde quia tu nobis ea donasti, sabbato vitae aeternae requiescamus in te.

[Sidenote: XXXVII. Deus in nobis quando quiescet.]

52. Etiam tunc enim sic requiesces in nobis, quemadmodum nunc operaris in
nobis; et ita erit illa requies tua per nos, quemadmodum sunt ista opera
tua per nos[385]. Tu autem, Domine, semper operaris, et semper requiescis.
Nec vides ad tempus*, nec moveris ad tempus, nec quiescis ad tempus; et
tamen facis et visiones temporales, et ipsa tempora, et quietem ex tempore.

[Sidenote: XXXVIII. Aliter Deus, aliter homo videt creata.]

53. Nos itaque ista quae fecisti videmus, quia sunt: tu autem quia vides
ea, sunt. Et nos foris videmus quia sunt, et intus quia _bona sunt_: tu
autem ibi vidisti facta, ubi vidisti facienda. Et nos alio tempore moti
sumus ad benefaciendum, posteaquam concepit de Spiritu tuo cor nostrum;
priore {280} autem tempore ad male faciendum movebamur deserentes te: tu
vero, Deus une bone, nunquam cessasti benefacere. Et sunt quaedam bona
opera nostra ex munere quidem tuo, sed non sempiterna; post illa nos
requieturos in tua grandi sanctificatione speramus: tu autem bonum nullo
indigens bono, semper quietus es; quoniam tua quies tu ipse es. Et hoc
intelligere quis hominum dabit homini? quis angelus angelo? quis angelus
homini? A te petatur, in te quaeratur, ad te pulsetur: [Sidenote: Mat. 7,
8.]sic, sic accipietur, sic invenietur, sic aperietur. Amen.

* * * * *

{281}

AUGUSTINIANI ANNALES,

SIVE

COMPENDIOSA S. AUGUSTINI VITA

CUM SUIS ANNORUM NOTIS.

* * * * *

PRAECIPUA FACTA.

Ann.
Aer. vulg.

354. Augustinus Thagastae nascitur, Patricio patre, matre Monnica, die
decima tertia Novembris; et paulo post catechumenis ascribitur.

370. Sextum decimum aetatis annum agens, studiis intermissis, ex otio
in luxuriam incidit. Mox Carthagine studens rhetoricae, libidinosi
amoris laqueo irretitur.

371. Patricius moritur, et Augustinus patre orbatus alitur Carthagine
sumptibus matris et ope Romaniani.

372. Cum secundum Carthagine annum degeret, filium Adeodatum ex
concubina suscipit.

374. In Manichaeorum haeresim labitur, et complures ex familiaribus
suis in eam pellicit: casum ejus deflet Monnica, et re