data --!

BRACK
Kial nevidata?

HEDDA
Por auxskulti iujn el viaj spritajxoj sen pudoraj diskretajxoj,
sinjoro Asesoro.

BRACK
(ridas) Tion mi ne volas konsili al la bela sinjorino.

TESMAN
(ankaux li ridas) Ne, nun vi estas amuza, Hedda. Jen, imagu!

BRACK
Nu, adiaux, adiaux, sinjorinoj!

LOVBORG
(kapklinas adiauxe) Do je la deka.

(_Brack_, _Lovborg_ kaj _Tesman_ eliras tra la pordo de la
antauxcxambro. Samtempe _Berte_ venas de la malantauxa cxambro kun
eklumigita lampo, kiun sxi metas sur la salontablon, kaj eliras la
saman vojon.)

ELVSTED
(ekstaris kaj maltrankvile pasxas sur la planko) Hedda, -- Hedda, --
al kio tio cxi kondukos!

HEDDA
Je la deka, -- tiam li do revenos. Mi vizie vidas lin. Kun vitfolioj
en la hararo. Verva kaj vigla --

ELVSTED
Dio donu ke tiel estos.

HEDDA
Kaj tiam, vidu, -- tiam li estos regajninta la regadon de si mem.
Tiam li estos libera homo dum cxiuj siaj tagoj.

ELVSTED
Ho Dio, jes, -- se nur tiel li venos, kiel vi lin vizias.

HEDDA
Tiel kaj ne alimaniere li venos! (ekstaras kaj sin proksimigas)
Dubu pri li, vi, tiom longe kiom vi volas. Mi fidas lin. Kaj nun ni
testu --

ELVSTED
Vi havas iun kasx-intencon, Hedda!

HEDDA
Jes, estas. Unu fojon en la vivo mi volas havi potencon sur la sorto
de homo.

ELVSTED
Cxu vi ne tion havas?

HEDDA
Ne havas -- kaj neniam havis.

ELVSTED
Sed sur via edzo do?

HEDDA
Hoj, _tio_ efektive valorus la penon. Ho, se vi povus kompreni, kiom
malricxa mi estas. Kaj _vi_ havu la favoron esti tiom ricxa!
(cxirkauxbrakas sxin pasie) Mi pensas, ke mi tamen forbruligos
viajn harojn.

ELVSTED
Lasu min! Lasu min! Mi timas vin, Hedda!

BERTE
(en la pordaperturo) La tetablo estas pretigita en la mangxocxambro,
Sinjorino.

HEDDA
Bone. Ni venos.

ELVSTED
Ne, ne, ne! Mi prefere iru hejmen sola! Tuj!

HEDDA
Sensencajxo! Unue vi havu tiun teakvon, vi eta stultulino. Kaj poste,
-- Je la deka, -- revenos Ejlert Lovborg -- kun vitfolioj en la
hararo.

(Kvazaux perforte sxi tiras _sinjorinon Elvsted_ al la pordo.)

TRIA AKTO

(La cxambro de _gesinjoroj Tesman_. La pordokurtenoj estas tiritaj
antaux la aperturo. Tiel same antaux la vitra pordo. Sur la tablo la
kerosenlampo kun sxirmilo, mecxo malsuprensxrauxbita, lumas malklare.
En la forno, kies pordo estas malferma, estis fajro, kiu nun preskaux
estingigxis.)

(_Sinjorino Elvsted_, envolvita en granda sxalo kaj kun la piedoj sur
skabelo, sidas tute apud la f