flamigxis, li tamen ne vekigxis el sia dormo.

BARONO

Tion faru. Fortiru lin tuj, surmetu al li belan cxemizon, kaj kusxigu
lin en mian plej bonan liton.

DUA AKTO

UNUA SCENO

JEPPE

(Kusxanta en la lito de la Barono kun orpasamenta negligxo sur segxo.
Li vekigxas kaj frotas siajn okulojn, rigardas cxirkauxen,
konsternigxas, ree frotas la okulojn, palpas sian kapon kaj per la
mano ekkaptas orbroditan noktocxapon. Li sxmiras kracxajxon sur la
okulojn kaj ree frotas ilin, turnas la cxapon kaj rigardadas gxin,
rigardadas sian belan cxemizon, kaj la negligxon, cxion; grimacas
strange. Intertempe ludigxas kvieta muziko, kaj auxdante tion Jeppe
kunplektas la manojn kaj ploras. Kiam la muziko estas finita, li
komencas paroli:)

Ej, kio estas tio? Kia pompo estas jeno, kaj kiel estas mi al jeno
veninta? Cxu mi songxas, aux cxu mi estas maldorma? Jes, mi estas
klare maldorma. Kie estas mia edzino, kie estas miaj infanoj, kie
estas mia domo, kaj kie estas Jeppe? Cxio estas sxangxita, ecx mi
mem. Ej, kio do estas tio cxi? Kio do estas tio cxi?

(Krias mallauxte kaj timeme)

Nille! Nille! Nille! Mi kredas, ke mi venis en la cxielon, Nille!
kaj tio tute senmerite.--Tamen cxu vere estas mi? Aspektas al mi, ke
jes; aspektas ankaux al mi, ke ne. Kiam mi palpas mian dorson, kiu
ankoraux suferas pro la batoj, kiujn mi ricevis, kiam mi auxdas min
paroli, kiam mi palpas mian kavan denton, sxajnas al mi, ke estas mi.
Sed se mi rigardas mian cxapon, mian cxemizon, la tutan lukson antaux
miaj okuloj, kaj auxskultas tiun dolcxan muzikon, jen diablo splitu
min cxu mi povas imagi, ke estas mi. Ne estas mi; mil fojojn mi estu
kanajlo se estas. Sed cxu eble mi songxas? Tamen sxajnas al mi ke ne.
Mi provos pincxi mian brakon; se tiam ne doloras, jen mi songxas; se
doloras, jen mi ne songxas.--Jes, mi sentis; mi estas maldorma. Certe
mi estas maldorma; tion neniu povas disputi; cxar se mi ne estis
maldorma, mi ja ne povis.... Sed kiel mi povas esti maldorma, kiam mi
vere pripensas? Ne povas esti erare, ke mi ja estas Jeppe sur la
Monto; mi ja scias, ke mi estas malricxa farmisto, sklavo, fripono,
kornulo, malsata pediko, larvo, kanajlo; kiel mi povas samtempe esti
Imperiestro kaj Sinjoro sur kastelo? Ne, jeno tamen estas nur songxo.
Plej bone estas, ke mi paciencu gxis mi vekigxos.

(La muziko rekomencas, kaj Jeppe ankorauxfoje ekploras.)

Ahx! cxu eblas ion tian auxdi en dormo? Ne eblas. Sed se estas
songxo, ke mi neniam