ux aplomba kiel en la vivo, sub la negxo kusxis
tiu kiu estis samtempe la plej forta kaj tamen la plej malforta de la
forpelitoj de Poker-Ebenajxo.

LA PARTNERO DE TENESIO

Mi opinias ke neniam ni sciis lian veran nomon. Certe, nia malscio
pri gxi neniam starigis por ni ajnspecan socian maloportunajxon cxar
cxe Sablo-Baro en 1854, viroj plejparte rebaptonomigxis. Foje tiuj
prunteprennomoj bazigxis sur iu diferencigo de kostumo, kiel en la kazo
de "Drelikajxo-Jacxjo"; aux sur iu aparteco de kutimo, kiel vidigxis en
"Salpetro-Vilcxjo," tiel nomata pro malordinara kvanto da tiu kemiajxo
en lia cxiutaga pano; aux pro malbonsxanca erareto, kiel elmontrigxis en
"La Fera Pirato," milda, malofendema viro gajninta tiun malbonauxguran
titolon pro sia bedauxrinda misprononco de la termino "feraj piritoj."
Eble tio estis la fonto de ia kruda heraldiko, sed mi devas kredi ke
la fenomeno rezultis de la fakto ke la vera nomo de iu viro en tiu
epoko dependis ununure de lia propra senpravigita deklaro. "Vi nomas
vin Klifordo, cxu?" diris Bostono, alparolante kun infinita malestimo
timidan novalveninton; "Infero plenas je tiaj Klifordoj!" Tiam li
prezentis la kompatindan viron, kies nomo malbonsxancis esti efektive
Klifordo, sub la kromnomo Garolo-Karolo, malbenita inspirajxo de la
momento restinta fiksita al li cxiam poste.

Sed ni revenu al la Partnero de Tenesio, kiun neniam ni konis alie
ol laux tiu relativa titolo. Tion ke iam li ekzistis kiel aparta kaj
sendependa individuo ni eksciis nur poste. Sxajnas ke en 1853 li
forlasis Poker-Ebenajxon por aliri San-Franciskon, lauxraporte por
havigi al si edzinon. Li neniam sukcesis preteriri Stoktonon. En tiu
loko li ekinteresigxis pri juna persono kelnerinanta cxe la hotelo kie
li prenis siajn mangxojn. Iun matenon li diris al sxi ion kio igis
sxin rideti ne malamikine, kaj iom koketuline rompi teleron da toastoj
super lia suprenrigardanta, serioza, simpla vizagxo kaj retirigxi
al la kuirejo. Li sekvis sxin kaj reaperis plurajn momentojn poste,
kovrite je ceteraj toastoj kaj venko. La saman tagon semajnon poste
jugxisto de la paco geedzigis ilin kaj ili revenis al Poker-Ebenajxo. Mi
konscias ke eblus pliteatrigi tiun aventureton sed mi preferas rakonti
gxin tiel kiel gxi estis rakontita cxe Sablo-Baro--en la ravinoj kaj
drinkejoj--kie cxiun sentimentalecon forta senso de humuro modifis.

Pri ilia geedza felicxo nur malmulto sciatas, eble pro tio ke Tenesio,
logxante cxe sia par