s, armed, and there mantells of the
garters; and the kyng that nowe is, knelyng before them with this
Reason.

_Ageinst miscreaunts themperour Sigismond
Hath shewid his myght which is Imperial:
Sithen Henry the Vth so noble a knyght was founde
For Crists cause in actis martial
Cherisshyng the chirch Lollardes had a falle
To give example to kyngs that suitede
And to this branche in especiall
While he dothe regne to love God and drede._

The iij^{d} Course sueth; that is to say,

Blaunde Surrey poudrid with quatrefoilis gilt. Venyson rostid.
Egrettes. Curlewe. Cokkes. Plover. Quailis. Snytes. Grete birdes.
Larkes. Carpe. Crabbe. Lech of iij colours. A colde bakemete like a
shelde quarterly redde and white, set with losengs and gilt, and
flours of borage. Fritour crispes. A Sotelte of our lady sittyng and
hir childe in hir lappe, and she holdyng in hir hand a crowne and
seint George knelyng on that oo side and seint Denyse on that other
side, presentyng the kyng, knelyng to our lady, with this Reason
folowyng;

_O blessid lady, Cristes moder dere,
And thou seint George, that callid art hir knyght,
Holy seint Denyse, O martir moost entier,
The sixt Henry here present in your sight,
Shewith of grace on hym your hevenly light
His tender yougth with vertue both avaunce
Bore by discent and by title of right
Justly to reigne in England and in Fraunce._"

"This same yere, the xxij day of Janeuere, there was an heretik brent
at the Tour hille: and on the morue next after there was a batayle
done in Smythfelde, withynne listes, bifore the kyng, bitwene John
Upton appellaunt, and John Downe defendaunt; and whan thei hadde long
foughton, the kyng toke it up into his handes and fargaff bothe
partes. Also this yere the kyng passid the see to Caleis upon seint
Georges day, and many grete lordes with hym; that is to say, First,
the Cardenall bisshop of Wynchestre, and than other bisshops folowyng;
that is to say, the bisshop of Bath, the bisshop of Ely, the bisshop
of Rochestre. Dukes; the duke of Yorke and the duke of Norfolk. Erles;
therle of Stafford, therle of Huntyngdon, therle of Warwik, therle of
Oxonford, therle of Devonshire, therle of Morteyn, therle of Ewe,
therle of Ormond. Barons; the lord Beaumont, the lord Bourghchier,
the lord Tiptofte, the lord FitzWater, the lord Roos, the lord
Audeley, the lord Faconbrigge, the lord Grey Cod