na crumena decus;
Pauperies latitat; cum conjuge, gaudia multa
Tecta ineunt; coelebs impediere minus;
Mulcet amor prolis, sopor est sine prole profundus;
Praecellit juvenis vi, pietate senex.
Nemo optet, nunquam venisse in luminis oras,
Aut periisse; scatet vita benigna bonis.

Br. 27.
Vita omnis scena est ludusque: aut ludere disce
Seria seponens, aut mala dura pati.

Br. 27.
Quae, sine morte, fuga est vitae, quam turba malorum
Non vitanda gravem, non toleranda facit?
Dulcia dat natura quidem, mare, sidera, terras,
Lunaque quas, et sol, itque reditque vias.
Terror inest aliis, moerorque, et siquid habebis,
Forte, boni, ultrices experiere vices.

Br. 27.
Terram adii nudus, de terra nudus abibo.
Quid labor efficiet? non, nisi nudus, ero.

Br. 27.
Natus eram lacrymans, lacrymans e luce recedo:
Sunt quibus a lacrymis vix vacat ulla dies.
Tale hominum genus est, infirmum, triste, misellum,
Quod mors in cineres solvit, et abdit humo.

Br. 29.
Quisquis adit lectos, elata uxore, secundos,
Naufragus iratas ille retentat aquas.

Br. 30.
Foelix ante alios nullius debitor aeris;
Hunc sequitur coelebs; tertius, orbe, venis.
Nee male res cessit, subito si funere sponsam,
Didatus magna dote, recondis humo.
His sapiens lectis, Epicurum quaerere frustra
Quales sint monades, qua fit inane, sinas.

Br. 31.
Optarit quicunque senex sibi longius aevum,
Dignus, qui multa in lustra senescat, erit.
Cum procul est, optat, cum venit, quisque senectam,
Incusat, semper spe meliora videt.

Br. 46.
Omnis vita nimis brevis est felicibus, una
Nox miseris longi temporis instar habet.

Br. 55.
Gratia ter grata est velox, sin forte moretur,
Gratia vix restat nomine digna suo.

Br. 56.
Seu prece poscatur, seu non, da, Jupiter, omne,
Magne, bonum; omne malum, et poscentibus, abnue nobis.