leisure moment, the language more delicate and the sentiments less
warm, and sent it to the Museum.]

I.

Gat ye me, O gat ye me,
O gat ye me wi' naething?
Rock and reel, and spinnin' wheel,
A mickle quarter basin.
Bye attour, my gutcher has
A hich house and a laigh ane,
A' for bye, my bonnie sel',
The toss of Ecclefechan.

II.

O haud your tongue now, Luckie Laing,
O hand your tongue and jauner;
I held the gate till you I met,
Syne I began to wander:
I tint my whistle and my sang,
I tint my peace and pleasure:
But your green graff, now, Luckie Laing,
Wad airt me to my treasure.

* * * * *

CLVI.

THE COOPER O' CUDDIE.

Tune--"_Bab at the bowster._"

[The wit of this song is better than its delicacy: it is printed in
the Museum, with the name of Burns attached.]

I.

The cooper o' Cuddie cam' here awa,
And ca'd the girrs out owre us a'--
And our gudewife has gotten a ca'
That anger'd the silly gude-man, O.
We'll hide the cooper behind the door;
Behind the door, behind the door;
We'll hide the cooper behind the door,
And cover him under a mawn, O.

II.

He sought them out, he sought them in,
Wi', deil hae her! and, deil hae him!
But the body was sae doited and blin',
He wist na where he was gaun, O.

III.

They cooper'd at e'en, they cooper'd at morn,
'Till our gude-man has gotten the scorn;
On ilka brow she's planted a horn,
And swears that they shall stan', O.
We'll hide the cooper behind the door,
Behind the door, behind the door;
We'll hide the cooper behind the door,
And cover him under a mawn, O.

* * * * *

CLVII.

SOMEBODY.

Tune--"_For the sake of somebody._"

[Burns seems to have borrowed two or three lines of this lyric from
Ramsay: he sent it to the Museum.]

I.

My heart is sair--I dare na tell--
My heart is sair for somebody;
I could wake a winter night
For the sake o' somebody.
Oh-hon! for somebody!
Oh-hey! for somebody!
I could range the world around,
For the sake o' somebody!

II.

Ye powers that smile on virtuous love,
O, sweetly smile on somebody!
Frae ilka danger keep him free,
And send me safe my somebody.
Oh-hon! for somebody!