lie the chief of the clan,
Altho' that his band be sma'.
May liberty meet wi' success!
May prudence protect her frae evil!
May tyrants and tyranny tine in the mist,
And wander their way to the devil!
III.
Here's a health to them that's awa,
Here's a health to them that's awa;
Here's a health to Tammie, the Norland laddie,
That lives at the lug o' the law!
Here's freedom to him that wad read,
Here's freedom to him that wad write!
There's nane ever fear'd that the truth should be heard,
But they wham the truth wad indite.
IV.
Here's a health to them that's awa,
Here's a health to them that's awa,
Here's Chieftain M'Leod, a chieftain worth gowd,
Tho' bred amang mountains o' snaw!
Here's a health to them that's awa,
Here's a health to them that's awa;
And wha winna wish guid luck to our cause,
May never guid luck be their fa'!
* * * * *
CCXLIV.
IS THERE, FOR HONEST POVERTY.
Tune--"_For a' that, and a' that._"
[In this noble lyric Burns has vindicated the natural right of his
species. He modestly says to Thomson, "I do not give you this song for
your book, but merely by way of _vive la bagatelle_; for the piece is
really not poetry, but will be allowed to be two or three pretty good
prose thoughts inverted into rhyme." Thomson took the song, but
hazarded no praise.]
I.
Is there, for honest poverty,
That hangs his head, and a' that?
The coward-slave, we pass him by,
We dare be poor for a' that!
For a' that, and a' that,
Our toils obscure, and a' that;
The rank is but the guinea's stamp,
The man's the gowd for a' that!
II.
What tho' on hamely fare we dine,
Wear hoddin gray, and a' that;
Gie fools their silks, and knaves their wine,
A man's a man, for a' that!
For a' that, and a' that,
Their tinsel show, and a' that;
The honest man, though e'er sae poor,
Is king o' men for a' that!
III.
Ye see yon birkie, ca'd--a lord,
Wha struts, and stares, and a' that;
Though hundreds worship at his word,
He's but a coof for a' that:
For a' that, and a' that,
His riband, star, and a' that,
The man of independent mind,
He looks and laughs at a' that.
IV.
A king can make a belted knight,
A marquis, duke, and a' that,
But an honest
|