Whate'er be your kith, whate'er be your kin,
Frae this ye mauna gae;
An' gin ye 'll consent to be my ain,
Nae marrow ye shall hae.
Sweet maiden, tak' the siller cup,
Sae fu' o' the damask wine,
An' press it to your cherrie lip,
For ye shall aye be mine.
An' drink, sweet doo, young Charlie's health,
An' a' your kin sae dear;
Culloden has dimm'd mony an e'e
Wi' mony a saut, saut tear.
THE THISTLE AND THE ROSE.
There grew in bonnie Scotland
A thistle and a brier,
And aye they twined and clasp'd,
Like sisters, kind and dear.
The rose it was sae bonnie,
It could ilk bosom charm;
The thistle spread its thorny leaf,
To keep the rose frae harm.
A bonnie laddie tended
The rose baith ear' and late;
He water'd it, and fann'd it,
And wove it with his fate;
And the leal hearts of Scotland
Pray'd it might never fa',
The thistle was sae bonny green,
The rose sae like the snaw.
But the weird sisters sat
Where Hope's fair emblems grew;
They drapt a drap upon the rose
O' bitter, blasting dew;
And aye they twined the mystic thread,--
But ere their task was done,
The snaw-white shade it disappear'd,
And wither'd in the sun!
A bonnie laddie tended
The rose baith ear' an' late;
He water'd it, and fann'd it,
And wove it with his fate;
But the thistle tap it wither'd,
Winds bore it far awa',
And Scotland's heart was broken,
For the rose sae like the snaw!
THE COVENANTER'S LAMENT.
TUNE--_"The Martyr's Grave."_
There 's nae Covenant now, lassie!
There 's nae Covenant now!
The Solemn League and Covenant
Are a' broken through!
There 's nae Renwick now, lassie,
There 's nae gude Cargill,
Nor holy Sabbath preaching
Upon the Martyrs' Hill!
It 's naething but a sword, lassie!
A bluidy, bluidy ane!
Waving owre poor Scotland,
For her rebellious sin.
Scotland 's a' wrang, lassie,
Scotland 's a' wrang--
It 's neither to the hill nor glen,
Lassie, we daur gang.
The Martyrs' Hill 's forsaken,
In simmer's dusk sae calm;
There 's nae gathering now, lassie,
To sing the e'ening psalm!
But the martyr's grave will rise, lassie,
Aboon the warrior's cairn;
An' the
|