es sweet wi' his sang,
An' wafts the saft notes till they die on the ear;
But Mary, whase presence sic transport conveys,
Whase beauties my moments o' pleasure control,
On the strings o' my heart ever wantonly plays,
An' each languishing note is a sigh frae my soul!

Her breath is as sweet as the sweet-scented brier,
That blossoms and blaws in yon wild lanely glen;
When I view her fair form which nae mortal can peer,
A something o'erpowers me I dinna weel ken.
What sweetness her snawy white bosom displays!
The blink o' her bonny black e'e wha' can thole!
On the strings o' my heart she bewitchingly plays,
An' each languishing note is a sigh frae my soul!

LOUISA IN LOCHABER.

Can ought be constant as the sun,
That makes the world sae cheerie?
Yes, a' the powers can witness be,
The love I bear my dearie.
But what can make the hours seem lang,
An' rin sae wondrous dreary?
What but the space that lies between
Me an' my only dearie.

Then fare ye weel, wha saw me aft,
Sae blythe, baith late and early;
An' fareweel scenes o' former joys,
That cherish life sae rarely;
Baith love an' beauty bid me flee,
Nor linger lang an' eerie,
But haste, an' in my arms enfauld,
My only pride an' dearie.

I 'll hail Lochaber's valleys green,
Where many a rill meanders;
I 'll hail wi' joy, its birken bowers,
For there Louisa wanders.
There will I clasp her to my breast,
An' tent her smile fu' cheerie;
An' thus, without a wish or want,
Live happy wi' my dearie.

THE HAZELWOOD WITCH.

For mony lang year I hae heard frae my grannie
Of brownies an' bogles by yon castle wa',
Of auld wither'd hags that were never thought cannie,
An' fairies that danced till they heard the cock caw.
I leugh at her tales; an' last owk, i' the gloamin',
I daunder'd, alane, down the hazelwood green;
Alas! I was reckless, and rue sair my roamin',
For I met a young witch, wi' twa bonnie black e'en.

I thought o' the starns in a frosty night glancing,
Whan a' the lift round them is cloudless an' blue;
I looked again, an' my heart fell a-dancing,
When I wad hae spoken, she glamour'd my mou'.
O wae to her cantrips! for dumpish I wander,
At kirk or at market there 's nought to be seen;