pu' the wild flowers a' for thee,
My only jo an' dearie, O.
I hae a wish I canna tine,
'Mang a' the cares that grieve me, O;
I wish that thou wert ever mine,
An' never mair to leave me, O;
Then I wad dawt thee night an' day,
Nae ither warldly care wad hae,
Till life's warm stream forgat to play,
My only jo an' dearie, O.
THE BONNIE BLINK O' MARY'S E'E.[110]
Now bank an' brae are clad in green,
An' scatter'd cowslips sweetly spring;
By Girvan's fairy-haunted stream,
The birdies flit on wanton wing;
By Cassillis' banks, when e'ening fa's,
There let my Mary meet wi' me,
There catch her ilka glance o' love,
The bonnie blink o' Mary's e'e.
The chiel' wha boasts o' warld's wealth
Is aften laird o' meikle care;
But Mary she is a' my ain,
An' Fortune canna gie me mair.
Then let me stray by Cassillis' banks,
Wi' her, the lassie dear to me,
An' catch her ilka glance o' love,
The bonnie blink o' Mary's e'e.
[110] Cromeck in his "Reliques," erroneously attributes this song to
Burns.
THE BRAES O' DRUMLEE.
Ere eild wi' his blatters had warsled me down,
Or reft me o' life's youthfu' bloom,
How aft hae I gane, wi' a heart louping light,
To the knowes yellow tappit wi' broom!
How aft hae I sat i' the beild o' the knowe,
While the laverock mounted sae hie,
An' the mavis sang sweet in the plantings around,
On the bonnie green braes o' Drumlee.
But, ah! while we daff in the sunshine of youth,
We see na' the blasts that destroy;
We count na' upon the fell waes that may come,
An eithly o'ercloud a' our joy.
I saw na the fause face that fortune can wear,
Till forced from my country to flee;
Wi' a heart like to burst, while I sobbed, "Farewell,
To the bonnie green braes o' Drumlee!
"Fareweel, ye dear haunts o' the days o' my youth,
Ye woods and ye valleys sae fair;
Ye 'll bloom whan I wander abroad like a ghaist,
Sair nidder'd wi' sorrow an' care.
Ye woods an' ye valleys, I part wi' a sigh,
While the flood gushes down frae my e'e;
For never again shall the tear weet my cheek,
On the bonnie green braes o' Drumlee.
"O Time, could I tether your hours for a wee!
Na, na, for they flit like the wind!"--
Sae I took my departure, an' saunter'
|