draps upon its cheeks will fa' frae ilka ee;
Oh! mony a, mony a burning tear upon its cheeks will fa',
For oh! its like my bonnie love, and he is far awa'.

Whan the spring time had gane by, an' the rose began to blaw,
An' the harebell an' the violet adorn'd ilk bonnie shaw;
'Twas then my love cam courtin' me, and wan my youthfu' heart,
An' mony a tear it cost my love ere he could frae me part;
But though he 's in a foreign land far, far across the sea,
I ken my Jamie's guileless heart is faithfu' unto me.

Ye wastlin win's upon the main blaw wi' a steady breeze,
And waft my Jamie hame again across the roaring seas;
Oh! whan he clasps me in his arms in a' his manly pride,
I 'll ne'er exchange that ae embrace for a' the warl' beside;
Then blaw a steady gale, ye win's, waft him across the sea,
And bring my Jamie hame again to his wee bairn an' me.

THE BATTLE OF VITTORIA.[39]

AIR--_"Whistle o'er the lave o 't."_

Sing a' ye bards, wi' loud acclaim,
High glory gie to gallant Graham,
Heap laurels on our marshal's fame
Wha conquer'd at Vittoria.
Triumphant freedom smiled on Spain,
An' raised her stately form again,
Whan the British lion shook his mane
On the mountains of Vittoria.

Let blustering Suchet crousely crack,
Let Joseph rin the coward's track,
An' Jourdan wish his baton back
He left upon Vittoria.
If e'er they meet their worthy king,
Let them dance roun' him in a ring,
An' some Scots piper play the spring
He blew them at Vittoria.

Gie truth and honour to the Dane,
Gie German's monarch heart and brain,
But aye in sic a cause as Spain
Gie Britain a Vittoria.
The English rose was ne'er sae red,
The shamrock waved whare glory led,
An' the Scottish thistle rear'd its head
In joy upon Vittoria.

Loud was the battle's stormy swell,
Whare thousands fought an' many fell,
But the Glasgow heroes bore the bell
At the battle of Vittoria.
The Paris maids may ban them a',
Their lads are maistly wede awa',
An' cauld an' pale as wreathes o' snaw
They lie upon Vittoria.

Peace to the souls, then, o' the brave,
Let all their trophies for them wave,
And green be our Cadogan's grave
Upon thy fields, Vittoria.
Shout on, my boys, your glasses drain,
And fill a bumper up again,