state and style,
That drive true feeling frae our isle!
In saxty years o' care and toil,
What ferlies do we see!
The lowliest heart a pride displays,
Unkent in our ain early days,
Ilk kind and canty thing decays,
Wi', How 's a' wi' ye.

When back we look on bygane years,
Weel may the cheek be wet wi' tears,
The cauld mool mony a bosom bears,
Ance dear to you and me;
Yet I will neither chafe nor chide,
While ane comes to my ingle side,
Whose bosom glows wi' honest pride
At, How 's a' wi' ye.

Newfangled guffs may things arrange
For further and still further change,
But strange things shall to me be strange,
While I can hear and see.
And when I gang, as I 'll do soon,
To join the leal in hames aboon,
I 'll greet them just as aye I 've doon,
Wi', How 's a' wi' ye.

OH! SAIR I FEEL THE WITCHING POWER.

TUNE--_"Miller of Dron," improved set._

Oh, sair I feel the witching power
O' that sweet pawkie e'e,
And sair I 'll rue the luckless hour
That e'er it shone on me;
Unless sic love as wounds this heart
Come frae that heart again,
And teach for aye the kindly ray
To blink on me alane.
Thy modest cheek aye mantling glows
Whene'er I talk o' love,
As rainbow rays upon the rose
Its native sweets improve;
Yet when the sunbeams leave yon tower,
And gloamin' vails the glen,
Will ye gang to the birken bower
When nane on earth can ken?
Oh, scenes delighting, smiles inviting,
Heartfelt pleasures len',
And oh! how fain to meet alane,
When nane on earth can ken!

Amang the lave I manna speak,
And when I look the while,
The mair I 'm seen, the mair I seek
Their watching to beguile;
But leave, dear lassie, leave them a',
And frae this heart sae leal
Thou 'lt hear the love, by glen and shaw,
It canna mair conceal.
My plaid shall shield thy peerless charms
Frae evening's fanning gale,
And saft shall be my circling arms,
And true my simple tale;
And seated by the murmuring brook,
Within the flowery den,
If love 's reveal'd in word or look,
There 's nane on earth can ken.
Oh! scenes delighting, smiles inviting,
Heartfelt pleasures len',
And oh! how fain to meet alane,
When nane on earth can ken.

Th