.[30]

When a' ither bairnies are hush'd to their hame
By aunty, or cousin, or frecky grand-dame,
Wha stands last and lanely, an' naebody carin'?
'Tis the puir doited loonie--the mitherless bairn!

The mitherless bairn gangs to his lane bed,
Nane covers his cauld back, or haps his bare head;
His wee hackit heelies are hard as the airn,
An' litheless the lair o' the mitherless bairn.

Aneath his cauld brow siccan dreams hover there,
O' hands that wont kindly to kame his dark hair;
But mornin' brings clutches, a' reckless an' stern,
That lo'e nae the locks o' the mitherless bairn!

Yon sister that sang o'er his saftly-rock'd bed
Now rests in the mools whare her mammie is laid;
The father toils sair their wee bannock to earn,
An' kens na' the wrangs o' his mitherless bairn.

Her spirit that pass'd in yon hour o' his birth,
Still watches his wearisome wanderings on earth;
Recording in heaven the blessings they earn,
Wha couthilie deal wi' the mitherless bairn!

Oh! speak him na' harshly--he trembles the while,
He bends to your bidding, and blesses your smile;
In their dark hour o' anguish, the heartless shall learn
That God deals the blow for the mitherless bairn!

[30] An Inverury correspondent writes: "Thom gave me the following
narrative as to the origin of 'The Mitherless Bairn;' I quote his own
words--'When I was livin' in Aberdeen, I was limping roun' the house to
my garret, when I heard the greetin' o' a wean. A lassie was thumpin' a
bairn, when out cam a big dame, bellowin', "Ye hussie, will ye kick a
mitherless bairn!" I hobbled up the stair, and wrote the sang afore
sleepin'.'"

THE LASS O' KINTORE.

AIR--_"Oh, as I was kiss'd yestreen."_

At hame or afield I am cheerless an' lone,
I 'm dull on the Ury, an' droop by the Don;
Their murmur is noisy, and fashious to hear,
An' the lay o' the lintie fa's dead on my ear.
I hide frae the morn, and whaur naebody sees;
I greet to the burnie, an' sich to the breeze;
Though I sich till I 'm silly, an' greet till I dee,
Kintore is the spot in this world for me.
But the lass o' Kintore, oh! the lass o' Kintore,
Be warned awa' frae the lass o' Kintore;
There 's a love-luring look that I ne'er kent afore
Steals cannily hame to the heart at Kintore.

They bid me forget her, oh! how can it be?