h to endure,
Make time to row round aye
The ae happy hour.
Ye lost to affection,
Whom avarice can move
To woo an' to marry
For a' thing but love;
Awa' wi' your sorrows,
Awa' wi' your store,
Ye ken na the pleasure
O' ae happy hour.
LASS, GIN YE WAD LO'E ME.
AIR--_"Lass, gin I come near you."_
"Lass, gin ye wad lo'e me,
Lass, gin ye wad lo'e me,
Ye'se be ladye o' my ha',
Lass, gin ye wad lo'e me.
A canty but, a cosie ben,
Weel plenish'd ye may trow me;
A brisk, a blithe, a kind gudeman--
Lass, gin ye wad lo'e me!"
"Walth, there 's little doubt ye ha'e,
An' bidin' bein an' easy;
But brisk an' blithe ye canna be,
An' you sae auld an' crazy.
Wad marriage mak' you young again?
Wad woman's love renew you?
Awa', ye silly doitet man,
I canna, winna lo'e you!"
"Witless hizzie, e'en 's you like,
The ne'er a doit I 'm carin';
But men maun be the first to speak,
An' wanters maun be speerin'.
Yet, lassie, I ha'e lo'ed you lang,
An' now I'm come to woo you;
I 'm no sae auld as clashes gang,
I think you 'd better lo'e me."
"Doitet bodie! auld or young,
Ye needna langer tarry,
Gin ane be loutin' o'er a rung,
He 's no for me to marry.
Gae hame an' ance bethink yoursel'
How ye wad come to woo me,
An' mind me i' your latter-will,
Bodie, gin ye lo'e me!"
LASS OF LOGIE.
AIR--_"Lass of Arranteenie."_
I 've seen the smiling summer flower
Amang the braes of Yarrow;
I 've heard the raving winter wind
Amang the hills of Barra;
I 've wander'd Scotland o'er and o'er,
Frae Teviot to Strathbogie;
But the bonniest lass that I ha'e seen
Is bonnie Jean of Logie.
Her lips were like the heather bloom,
In meekest dewy morning;
Her cheeks were like the ruddy leaf,
The bloomy brier adorning;
Her brow was like the milky flower
That blossoms in the bogie;
And love was laughing in her een--
The bonnie lass of Logie.
I said, "My lassie, come wi' me,
My hand, my hame are ready;
I ha'e a lairdship of my ain,
And ye shall be my ladye.
I 've ilka thing baith out and in,
To make you blithe and vogie;"
She hung her head and sweetly smiled--
The bonnie lass of Logie!
|