But she has smiled, and fate has frown'd,
And wrung my heart with sorrow;
The bonnie lass sae dear to me
Can never be my marrow.
For, ah! she loves another lad--
The ploughman wi' his cogie;
Yet happy, happy may she be,
The bonnie lass of Logie!
MY AIN WIFE.
AIR--_"John Anderson, my Jo."_
I wadna gi'e my ain wife
For ony wife I see;
For, Oh! my dainty ain wife,
She 's aye sae dear to me.
A bonnier yet I 've never seen,
A better canna be;
I wadna gi'e my ain wife
For ony wife I see.
Though beauty is a fadin' flower,
As fadin' as it 's fair,
It looks fu' well in ony wife,
An' mine has a' her share.
She ance was ca'd a bonnie lass--
She 's bonnie aye to me;
I wadna gi'e my ain wife
For ony wife I see.
Oh, couthy is my ingle-cheek,
An' cheery is my Jean;
I never see her angry look,
Nor hear her word on ane.
She 's gude wi' a' the neebours roun',
An' aye gude wi' me;
I wadna gi'e my ain wife
For ony wife I see.
But Oh, her looks sae kindly,
They melt my heart outright,
When ower the baby at her breast
She hangs wi' fond delight.
She looks intill its bonnie face,
An' syne looks to me;
I wadna gi'e my ain wife
For ony wife I see.
THE MAID O' MONTROSE.
AIR--_"O tell me the Way for to Woo."_
O sweet is the calm dewy gloaming,
When saftly by Rossie-wood brae,
The merle an' mavis are hymning
The e'en o' the lang summer's day!
An' sweet are the moments when o'er the blue ocean,
The full moon arising in majesty glows;
An' I, breathing o'er ilka tender emotion,
Wi' my lovely Mary, the Maid o' Montrose.
The fopling sae fine an' sae airy,
Sae fondly in love wi' himsel',
Is proud wi' his ilka new dearie,
To shine at the fair an' the ball;
But gie me the grove where the broom's yellow blossom
Waves o'er the white lily an' red smiling rose,
An' ae bonnie lassie to lean on my bosom--
My ain lovely Mary, the Maid o' Montrose.
O what is the haill warld's treasure,
Gane nane o' its pleasures we prove?
An' where can we taste o' true pleasure,
Gin no wi' the lassie we love?
O sweet are the smiles an' the dimples o' beauty,
Where lu
|