lerius despendid so gret good upon the comyn profit of the said cite, to
kepe and maynteyne the honoure of the citee, defending the cite and
contreis about from here ennemies, that he died in gret povertee, but by
the cenatours relevyng, and for his worshipfulle dedis they buried hym in
the most solempne wise according to his worship. And the said juge Boecius
loved rightwisnesse to be kept, and the pore comyns of Rome in that
susteyned and maynteyned that he spared nothir lord ne none astate. But
suffred hym to stande in the daunger of the hethyn king of Rome, and to be
in exile rathir {53} than he wolde offende justice. Notwithestanding the
saide adversite and tribulacions felle unto hem for avaunsing and tendring
the comyn wele, and alle men of worship may put hem in worshipfulle
remembraunce among worthy princes to here gret renomme and laude. Also it
is to be noted that was one of the gret causis that the princes Romayns
were so gret conquerours and helde the straunge roiaumes so long in
subjeccion, but only using of trouthe and justice keping in here
conquestis.

[Sidenote: De justicia Camilli in obcidionibus historia gloriosa.]

A fulle noble historie how that Camillus the duke of Rome wolde use justice
in his conquest.

[Sidenote: Quod princeps debet vincere cicius per justiciam quam per
traditionem.]

[Sidenote: Titus Livius decade primo.]

[Sidenote: Florens cytee.]

[Sidenote: Camillus.]

[Sidenote: Conciderandum.]

[Sidenote: Proposicio ad Romanos gentes.]

In example I rede in the Romayns stories of Titus Livius in the booke of
the first decade that a prince Romayn clepid Camillus, whiche did so many
victorioux dedis, and loved so welle the comyn profit of the cite of Rome,
that he was called the second Romulus whiche founded first Rome, besieged a
gret cite of Falistes, whiche is nowe as it is saide called Florence, to
have hem undre the governaunce of the Romayne lawes. And as he had leyne
long at the siege, and after gret batailes and scarmysshes it fortuned that
a maister of sciencis of Falliste called now Florence, the whiche had all
the enfauntes and childryn of the gouvernours and worshipfulle men of the
saide citee in his rule to lerne hem virtuous sciencis, thought to wynne a
gret rewarde and thank of the noble prince Camillus, and by the umbre of
treson ayenst justice that the said maistre wolde wirke to cause the
senatours of Faliste [the rather[149]] to deliver up the cite to the
prin