I grat to see the lad come back
That had been lang away.
An' Charlie is my darling, &c.

Then ilka bonny lassie sang,
As to the door she ran,
Our King shall hae his ain again,
An' Charlie is the man:
For Charlie he 's my darling, &c.

Out ow'r yon moory mountain,
An' down the craggy glen,
Of naething else our lasses sing,
But Charlie an' his men.
An' Charlie he 's my darling, &c.

Our Highland hearts are true an' leal,
An' glow without a stain;
Our Highland swords are metal keen,
An' Charlie he 's our ain.
An' Charlie he 's my darling,
My darling, my darling;
Charlie he 's my darling,
The young Chevalier.

[57] Altered at the request of a lady who sang it sweetly, and published
in the "Jacobite Relics."--_Hogg._

LOVE IS LIKE A DIZZINESS.

AIR--_"Paddy's Wedding."_

I lately lived in quiet ease,
An' never wish'd to marry, O!
But when I saw my Peggy's face,
I felt a sad quandary, O!
Though wild as ony Athol deer,
She has trepann'd me fairly, O!
Her cherry cheeks an' e'en sae clear
Torment me late an' early, O!
O, love, love, love!
Love is like a dizziness,
It winna let a poor body
Gang about his business!

To tell my feats this single week,
Would mak' a daft-like diary, O!
I drave my cart outow'r a dike,
My horses in a miry, O!
I wear my stockings white an' blue,
My love 's sae fierce an' fiery, O!
I drill the land that I should plough,
An' plough the drills entirely, O!
O, love, love, love! &c.

Ae morning, by the dawn o' day,
I rose to theek the stable, O!
I keust my coat an' plied away
As fast as I was able, O!
I wrought that morning out an' out,
As I 'd been redding fire, O!
When I had done an' look'd about,
Gude faith, it was the byre, O!
O, love, love, love! &c.

Her wily glance I 'll ne'er forget,
The dear, the lovely blinkin' o't
Has pierced me through an' through the heart,
An' plagues me wi' the prinklin' o't.
I tried to sing, I tried to pray,
I tried to drown 't wi' drinkin' o't,
I tried wi' sport to drive 't away,
But ne'er can sleep for thinkin' o't.
O, love, love, love! &c.

Nae man can tell what pains I prove,