o fyght,
ther-to the wear fulle fayne,
Tylle the bloode owte off thear basnetes sprente,
as ever dyd heal or rayn.

33.
'Yelde the, Perse,' sayde the Doglas,
'and i feth I shalle the brynge
Wher thowe shalte have a yerls wagis
of Jamy our Skottish kynge.

34.
'Thou shalte have thy ransom fre,
I hight the hear this thinge;
For the manfullyste man yet art thowe
that ever I conqueryd in filde fighttynge.'

35.
'Nay,' sayd the lord Perse,
'I tolde it the beforne,
That I wolde never yeldyde be
to no man of a woman born.'

36.
With that ther cam an arrowe hastely,
forthe off a myghtte wane;
Hit hathe strekene the yerle Duglas
in at the brest-bane.

37.
Thorowe lyvar and longes bathe
the sharpe arrowe ys gane,
That never after in all his lyffe-days
he spayke mo wordes but ane:
That was, 'Fyghte ye, my myrry men, whyllys ye may,
for my lyff-days ben gan.'

38.
The Perse leanyde on his brande,
and sawe the Duglas de;
He tooke the dede mane by the hande,
and sayd, 'Wo ys me for the!

39.
'To have savyde thy lyffe, I wolde have partyde with
my landes for years thre,
For a better man, of hart nare of hande,
was nat in all the north contre.'

40.
Off all that se a Skottishe knyght,
was callyd Ser Hewe the Monggombyrry;
He sawe the Duglas to the deth was dyght,
he spendyd a spear, a trusti tre.

41.
He rod uppone a corsiare
throughe a hondrith archery:
He never stynttyde, nar never blane,
tylle he cam to the good lord Perse.

42.
He set uppone the lorde Perse
a dynte that was full soare;
With a suar spear of a myghtte tre
clean thorow the body he the Perse ber,

43.
A the tothar syde that a man myght se
a large cloth-yard and mare:
Towe bettar captayns wear nat in Cristiante
then that day slan wear ther.

44.
An archar off Northomberlonde
say slean was the lord Perse;
He bar a bende bowe in his hand,
was made off trusti tre.

45.
An arow, that a cloth-yarde was lang,
to the harde stele halyde he;
A dynt that was both sad and soar
he sat on Ser Hewe the Monggombyrry.

46.
The dynt yt was both sad and sar,
that he of Monggomberry sete;
The swane-fethars that his arrowe bar
with his hart-blood the wear wete.

47.
Ther was never a freake wone foot wolde fle,
but stil