lever to be rynde and rente,
By Mary, that mykkel maye,
Then ever my manhood schulde be reprovyd
Wyth a Skotte another daye.
43.
'Wherefore schote, archars, for my sake,
And let scharpe arowes flee:
Mynstrell, playe up for your waryson,
And well quyt it schall bee.
44.
'Every man thynke on hys trewe-love,
And marke hym to the Trenite;
For to God I make myne avowe
Thys day wyll I not flee.'
45.
The blodye harte in the Dowglas armes,
Hys standerde stood on hye,
That every man myght full well knowe;
By syde stode starres thre.
46.
The whyte lyon on the Ynglyssh perte,
For soth as I yow sayne,
The lucettes and the cressawntes both;
The Skottes faught them agayne.
47.
Vpon Sent Androwe lowde can they crye,
And thrysse they schowte on hyght,
And syne merked them one owr Ynglysshe men,
As I haue tolde yow ryght.
48.
Sent George the bryght, owr ladyes knyght,
To name they were full fayne:
Owr Ynglyssh men they cryde on hyght,
And thrysse the schowtte agayne.
49.
Wyth that scharpe arowes bygan to flee,
I tell yow in sertayne;
Men of armes byganne to joyne,
Many a dowghty man was ther slayne.
50.
The Perssy and the Dowglas mette,
That ether of other was fayne;
They swapped together whyll that the swette,
Wyth swordes of fyne collayne:
51.
Tyll the bloode from ther bassonnettes ranne,
As the roke doth in the rayne;
'Yelde the to me,' sayd the Dowglas,
'Or elles thow schalt be slayne.
52.
'For I see by thy bryght bassonet,
Thow arte sum man of myght;
And so I do by thy burnysshed brande;
Thow arte an yerle, or elles a knyght.'
53.
'By my good faythe,' sayd the noble Perssye,
'Now haste thou rede full ryght;
Yet wyll I never yelde me to the,
Whyll I may stonde and fyght.'
54.
They swapped together whyll that they swette,
Wyth swordes scharpe and long;
Ych on other so faste thee beette,
Tyll ther helmes cam in peyses dowyn.
55.
The Perssy was a man of strenghth,
I tell yow, in thys stounde;
He smote the Dowglas at the swordes length
That he fell to the growynde.
56.
The sworde was scharpe, and sore can byte,
I tell yow in sertayne;
To the harte he cowde hym smyte,
Thus was the Dowglas slayne.
57.
The stonderdes stode styll on eke a syde,
Wyth many a grevo
|