Henr' Cobham.
[Sidenote: Weres in Tempse were stroid.]
[Sidenote: The citezeynes of London scholde paye noo toll on this syde
the see, no beyonde the see.]
This yere the schirrevehood of London and Midd' weren leten to ferme
to the schirreves of London for ccc^{li} be yere, whiche was graunted
the xviij day of Feverere in this sayd yere. Also the same day it was
graunted be the kyng that alle the weres in Thamyse schulde ben broken
up and distroied, and never after schulde be set ayene. Also the xvj
day of March in this yere the kyng graunted be his chartre to hise
citezeyns of London, that no toll schulde be taken of them in no
kynges lond, as well on this syde the see as beyonde the see; and yf
ony toll were taken of ony citezeyn of London, that thanne the
schirreves of London schulde taken at London distresse of the folk of
the contre, what tyme that they myghte be founden in London
notwithstondynge. Also the xviij day of August suynge the kyng
graunted to the maire of London waryne.
Id'm maior. Steph'us Bokerell. A^{o}. xij^{o}.
Henr' Cobham.
[Sidenote: Clerkes and seriaunts of the schirreve.]
[Sidenote: A comown seal.]
In this yere, the viij day of Juyn the libertes and the fraunchises of
London were ratified; and also the kyng graunted that every schirreve
of London schulde have too clerkes and too seriauntes and no mo for
that office. Also the kyng graunted the same tyme to the citezeyns of
London that they schulde have a comown seal, whiche schulde ben in
kepynge of too aldermen and too commons of the citee: and the forsaid
seal scholde nought be denyed nor warned to poure no riche of the same
citee whanne thei hadde nede, yf there cause were resonable; and that
no mede schulde be take no payed of eny man in no manner wyse for the
said seall.
REX HENRICUS T'CIUS. [1228-1232.]
Id'm maior. Walt' Wynchestre. Anno xiij^{mo}.
Rob' Fitz John.
Id'm maior. Ric' Fitz Walter. Anno xiiij^{mo}.
John Wobourne.
In this yere it was be the maire and be the aldermen, with the
counseill and assent of alle the citee, and be othe sworne on the
Evaungelies, that fro this tyme forth there schull never schirreves of
London abyde leng' in that office thanne on yere. And in this yere the
same Roger was discharged of the office of the meiralte.
Andrew Bokerell, m'. Mich' of Seynt Eleynes. A^{o}. xv^{o}.
Walt' Senfor
|