"I'll tak ye to my father's ha',
In yon green field beside the shaw;
I'll mak you lady o' them a'--
The brawest wife in Gowrie."

Soft kisses on her lips I laid,
The blush upon her cheek soon spread;
She whisper'd modestly, and said,
"I'll gang wi' you to Gowrie."

The auld folks soon ga'e their consent,
Syne for Mess John they quickly sent,
Wha tied them to their heart's content,
And now she's Lady Gowrie.

Mr Lyle, in his "Ancient Ballads and Songs" (Lond. 1827, 12mo, p. 138),
presents an additional version, which we subjoin. Mr Lyle remarks, that
he had revised it from an old stall copy, ascribed to Colonel James
Ramsay of Stirling Castle.

THE BONNIE LASS O' GOWRIE.

A wee bit north frae yon green wood,
Whar draps the sunny showerie,
The lofty elm-trees spread their boughs,
To shade the braes o' Gowrie;
An' by yon burn ye scarce can see,
There stan's a rustic bowerie,
Whar lives a lass mair dear to me
Than a' the maids in Gowrie.

Nae gentle bard e'er sang her praise,
'Cause fortune ne'er left dowrie;
The rose blaws sweetest in the shade,
So does the flower o' Gowrie.
When April strews her garlands roun',
Her bare foot treads the flowerie;
Her sang gars a' the woodlands ring,
That shade the braes o' Gowrie.

Her modest blush an' downcast e'e,
A flame sent beating through me;
For she surpasses all I've seen,
This peerless flower o' Gowrie.
I've lain upon the dewy green
Until the evening hourie,
An' thought gin e'er I durst ca' mine
The bonnie lass o' Gowrie.

The bushes that o'erhang the burn,
Sae verdant and sae flowerie,
Can witness that I love alane
The bonnie lass o' Gowrie.
Let ithers dream an' sigh for wealth,
An' fashions fleet and flowery;
Gi'e me that heav'nly innocence
Upon the braes o' Gowrie.

THERE GROWS A BONNIE BRIER BUSH.[56]

There grows a bonnie brier bush in our kail-yard,
And white are the blossoms o't in our kail-yard,
Like wee bit white cockauds to deck our Hieland lads,
And the lasses lo'e the bonnie bush in our kail-yard.

An' it 's hame, an' it 's