Dinna think the thought is sad;
Life vex'd me aft, but this maks glad;
When cauld my heart and closed my e'e,
Bonnie shall the dreams o' my slumbers be.

FOOTNOTES:

[11] These verses were composed when the author was suffering from a
severe pulmonary complaint which he feared would bring him to an early
grave. They were addressed to his sister, a girl of five years, who at
this period was his companion in his walks.

OH, SOFTLY SIGHS THE WESTLIN' BREEZE.

Oh, softly sighs the westlin' breeze
Through floweries pearl'd wi' dew;
An' brightly lemes the gowden sky,
That skirts the mountain blue.
An' sweet the birken trees amang,
Swells many a blithesome lay;
An' loud the bratlin burnie's voice
Comes soundin' up the brae.

But, ah! nae mair the sweets o' spring
Can glad my wearied e'e;
Nae mair the summer's op'ning bloom
Gies ought o' joy to me.
Dark, dark to me the pearly flowers,
An' sad the mavis sang,
An' little heart hae I to roam
These leafy groves amang.

She 's gane! she 's gane! the loveliest maid!
An' wae o'erpress'd I pine;
The grass waves o'er my Myra's grave!
Ah! ance I ca'd her mine.
What ither choice does fate afford,
Than just to mourn and dee,
Sin' gane the star that cheer'd my sky,
The beam that bless'd my e'e?

At gloamin' hour alang the burn,
Alane she lo'ed to stray,
To pu' the rose o' crimson bloom,
An' haw-flower purple gray.
Their siller leaves the willows waved
As pass'd that maiden by;
An' sweeter burst the burdies' sang
Frae poplar straight an' high.

Fu' aften have I watch'd at e'en
These birken trees amang,
To bless the bonnie face that turn'd
To where the mavis sang;
An' aft I 've cross'd that grassy path,
To catch my Myra's e'e;
Oh, soon this winding dell became
A blissful haunt to me.

Nae mair a wasting form within,
A wretched heart I bore;
Nae mair unkent, unloved, and lone,
The warl' I wander'd o'er.
Not then like now my life was wae,
Not then this heart repined,
Nor aught of coming ill I thought,
Nor sigh'd to look behind.

Cheer'd by gay hope's enliv'ning ray,
An' warm'd wi' minstrel fire,
Th' expected meed that maiden's smile,
I strung my rustic lyre.
That lyre a pitying