primroses blaw.

Cauld 's the snaw at my head,
And cauld at my feet,
And the finger o' death 's at my een,
Closing them to sleep.

Let nane tell my father,
Or my mither dear:
I 'll meet them baith in heaven,
At the spring o' the year.

IT 'S HAME, AND IT 'S HAME.

It 's hame, and it 's hame, hame fain wad I be,
An' it 's hame, hame, hame, to my ain countrie!
When the flower is i' the bud, and the leaf is on the tree,
The lark shall sing me hame in my ain countrie;
It 's hame, and it 's hame, hame fain wad I be,
An' it 's hame, hame, hame, to my ain countrie!

The green leaf o' loyalty 's beginning for to fa',
The bonnie white rose it is withering an' a':
But I 'll water 't wi' the blude of usurping tyrannie,
An' green it will grow in my ain countrie.
It 's hame, and it 's hame, hame fain wad I be,
An' it 's hame, hame, hame, to my ain countrie!

There 's naught now frae ruin my country to save,
But the keys o' kind Heaven to open the grave,
That a' the noble martyrs who died for loyaltie,
May rise again and fight for their ain countrie.
It 's hame, and it 's hame, hame fain wad I be,
And it 's hame, hame, hame, to my ain countrie!

The great now are gane, a' who ventured to save,
The new grass is springing on the tap o' their grave;
But the sun through the mirk blinks blithe in my e'e:
"I 'll shine on ye yet in your ain countrie."
It 's hame, an' it 's hame, hame fain wad I be,
An' it 's hame, hame, hame, to my ain countrie!

THE LOVELY LASS OF INVERNESS.

There lived a lass in Inverness,
She was the pride of a' the town;
Blithe as the lark on gowan-tap,
When frae the nest but newly flown.
At kirk she won the auld folks' love,
At dance she was the young men's een;
She was the blithest aye o' the blithe,
At wooster-trystes or Hallowe'en.

As I came in by Inverness,
The simmer-sun was sinking down;
Oh, there I saw the weel-faur'd lass,
And she was greeting through the town:
The gray-hair'd men were a' i' the streets,
And auld dames crying, (sad to see!)
"The flower o' the lads of Inverness
Lie dead upon Culloden-lee!"

She tore her haffet-links of gowd,
And dighted aye her comely e'e;
"My father's head 's on Carlisle wall,
At Preston sleep my bret