Folia caudicem terminantia numerosissima
patula, apicibus arcuato-recurvis, lorea, solida, ancipitia apice
teretiusculo, novella undique tecta pilis adpressis strictis acutis
laevibus, angulis lateralibus et ventrali retrorsum scabris. Pedunculi
numerosi teretes 8-12-pollicares crassitie digiti, vaginis integris
brevibus imbricatis hinc in foliolum subulatum productis tecti. Capitulum
globosum, floridum magnitudine pruni minoris, fructiferum pomum parvum
aequans. Flores undique dense imbricati, tribracteati, sessiles. Bractea
exterior lanceolata breve acuminata planiuscula erecta, extus villosa
intus glabra, post lapsum fructus persistens: duae laterales
angusto-naviculares, acutissimae, carina lateribusque villosis,
longitudine fere exterioris, simul cum perianthio fructifero, separatim
tamen, dilabentibus. Perianthium sexpartitum regulare subaequale
glumaceum: foliola lanceolata acutissima disco nervoso nervis immersis
simplicissimis, antica et postica plana, lateralia complicata lateribus
inaequalibus, omnia basi subangustata, extus longitudinaliter sed extra
medium praecipue villosa, intus glaberrima, aestivatione imbricata.
Stamina sex subaequalia, aestivatione stricta filamentis sensim
elongantibus: Filamenta fere hypogyna ipsis basibus foliolorum perianthii
quibus opposita leviter adhaerentia, filiformia glabra teretia: Antherae
stantes, ante dehiscentiam lineares obtusae filamento paulo latiores,
defloratae subulatae vix crassitie filamenti, loculis parallelo-contiguis
connectivo dorsali angusto adnatis, axi ventrali longitudinaliter
dehiscentibus, lobulis baseos brevibus acutis subadnatis: Pollen simplex
breve ovale laeve. Pistillum: Ovarium sessile disco nullo squamulisve
cinctum, lanceolatum trigono-anceps villosum, triloculare, loculis
monospermis. Ovula erecta fundo anguli interioris loculi paulo supra
basin suam inserta, obovata lenticulari-compressa, aptera: Testa in ipsa
basi acutiuscula foramine minuto perforata: Membrana interna respectu
testae inversa, hujusce nempe apici lata basi inserta, ovata apice
angustato aperto foramen testae obturante: Nucleus cavitate membranae
conformis, ejusdem basi insertus, caeterum liber, pulposus solidus, apice
acutiusculo laevi aperturam membranae internae attingente. Stylus
trigonus strictus, infra villosus, dimidio superiore glabro, altitudine
staminum, iisdem paulo praecocior, exsertus nempe dum illa adhuc inclusa.
Stigmata tria brevissima acuta denticuliformia. Per
|