arriage of Sir
Gawain_ (First Series, pp. 107-118). A Danish ballad, _Ebbe Galt_, has
similar incidents.
THE KNIGHT AND THE SHEPHERD'S DAUGHTER
1.
There was a shepherd's dochter
Kept sheep upon yon hill,
And by cam a gay braw gentleman,
And wad hae had his will.
2.
He took her by the milk-white hand,
And laid her on the ground,
And whan he got his will o' her
He lift her up again.
3.
'O syne ye've got your will o' me,
Your will o' me ye've taen,
'Tis all I ask o' you, kind sir,
Is to tell to me your name.'
4.
'Sometimes they call me Jack,' he said,
'Sometimes they call me John,
But whan I am in the king's court,
My name is Wilfu' Will.'
5.
Than he loup on his milk-white steed,
And straught away he rade,
And she did kilt her petticoats,
And after him she gaed.
6.
He never was sae kind as say,
'O lassie, will ye ride?'
Nor ever had she the courage to say,
'O laddie, will ye bide!'
7.
Until they cam to a wan water,
Which was called Clyde,
And then he turned about his horse,
Said, 'Lassie, will ye ride?'
8.
'I learned it in my father's hall,
I learned it for my weel,
That whan I come to deep water,
I can swim as it were an eel.
9.
'I learned it in my mother's bower,
I learned it for my better,
That whan I come to broad water,
I can swim like any otter.'
10.
He plunged his steed into the ford,
And straught way thro' he rade,
And she set in her lilly feet,
And thro' the water wade.
11.
And whan she cam to the king's court,
She tirled on the pin,
And wha sae ready's the king himsel'
To let the fair maid in?
12.
'What is your will wi' me, fair maid?
What is your will wi' me?'
'There is a man into your court
This day has robbed me.'
13.
'O has he taen your gold,' he said,
'Or has he taen your fee?
Or has he stown your maidenhead,
The flower of your bodye?'
14.
'He has na taen my gold, kind sir,
Nor as little has he taen my fee,
But he has taen my maidenhead,
The flower of my bodye.'
15.
'O gif he be a married man,
High hangit shall he be,
But gif he be a bachelor,
His body I'll grant thee.'
16.
'Sometimes they call him Jack,' she said,
'Sometimes they call him John,
But when he's in the king's court,
His name is Sweet William.'
|