ckin' their lane,
The mornin' licht cam grey an' plain,
An' the birds they yammert on stick an' stane,
An' the muene was shinin' clearly!
O years ayont, O years awa',
My lads, ye'll mind whate'er befa'--
My lads, ye'll mind on the bield o' the law,
When the muene was shinin' clearly.
V
A LOWDEN SABBATH MORN
The clinkum-clank o' Sabbath bells
Noo to the hoastin' rookery swells,
Noo faintin' laigh in shady dells,
Sounds far an' near,
An' through the simmer kintry tells
Its tale o' cheer.
An' noo, to that melodious play,
A' deidly awn the quiet sway--
A' ken their solemn holiday,
Bestial an' human,
The singin' lintie on the brae,
The restin' plou'man.
He, mair than a' the lave o' men,
His week completit joys to ken;
Half-dressed, he daunders out an' in,
Perplext wi' leisure;
An' his raxt limbs he'll rax again
Wi' painfue' pleesure.
The steerin' mither strang afit
Noo shoos the bairnies but a bit;
Noo cries them ben, their Sinday shueit
To scart upon them,
Or sweeties in their pooch to pit,
Wi' blessin's on them.
The lasses, clean frae tap to taes,
Are busked in crunklin' underclaes;
The gartened hose, the weel-fllled stays,
The nakit shift,
A' bleached on bonny greens for days,
An' white's the drift.
An' noo to face the kirkward mile:
The guidman's hat o' dacent style,
The blackit shoon we noo maun fyle
As white's the miller:
A waefue' peety tae, to spile
The warth o' siller.
Our Marg'et, aye sae keen to crack,
Douce-stappin' in the stoury track,
Her emeralt goun a' kiltit back
Frae snawy coats,
White-ankled, leads the kirkward pack
Wi' Dauvit Groats.
A thocht ahint, in runkled breeks,
A' spiled wi' lyin' by for weeks,
The guidman follows closs, an' cleiks
The sonsie missis;
His sarious face at aince bespeaks
The day that this is.
And aye an' while we nearer draw
To whaur the kirkton lies alaw,
Mair neebours, comin' saft an' slaw
Frae here an' there,
The thicker thrang the gate an' caw
The stour in air.
But hark! the bells frae nearer clang;
To rowst the slaw their sides they bang;
An' see! black coats a'ready thrang
The green kirkyaird;
And at the yett, the chestnuts spang
That brocht the laird.
The s
|