to hauld them company, and the lads to egg them on;
and this thing was its lee-lane. And there would be a fiddler diddling
his elbock in the chimney-side; and this thing had nae music but the
skirling of the solans. And the lassies were bits o' young things wi'
the reid life dinnling and stending in their members; and this was a
muckle, fat, crieshy man, and him fa'n in the vale o' years. Say what ye
like, I maun say what I believe. It was joy was in the creature's heart;
the joy o' hell, I daursay: joy whatever. Mony a time I have askit
mysel', why witches and warlocks should sell their sauls (whilk are
their maist dear possessions) and be auld, duddy, wrunkl't wives or
auld, feckless, doddered men; and then I mind upon Tod Lapraik dancing
a' they hours by his lane in the black glory of his heart. Nae doubt
they burn for it in muckle hell, but they have a grand time here of it,
whatever!--and the Lord forgie us!
Weel, at the hinder end, we saw the wee flag yirk up to the mast-held
upon the harbour rocks. That was a' Sandie waited for. He up wi' the
gun, took a deleeberate aim, an' pu'd the trigger. There cam' a bang and
then ae waefu' skirl frae the Bass. And there were we rubbin' our een
and lookin' at ither like daft folk. For wi' the bang and the skirl the
thing had clean disappeared. The sun glintit, the wund blew, and there
was the bare yaird whaur the Wonder had been lowping and flinging but ae
second syne.
The hale way hame I roared and grat wi' the terror of that dispensation.
The grawn folk were nane sae muckle better; there was little said in
Sandie's boat but just the name of God; and when we won in by the pier,
the harbour rocks were fair black wi' the folk waitin' us. It seems they
had fund Lapraik in ane of his dwams, cawing the shuttle and smiling. Ae
lad they sent to hoist the flag, and the rest abode there in the
wabster's house. You may be sure they liked it little; but it was a
means of grace to severals that stood there praying in to themsel's (for
nane cared to pray out loud) and looking on thon awesome thing as it
cawed the shuttle. Syne, upon a suddenty, and wi' the ae driedfu'
skelloch, Tod sprang up frae his hinderlands and fell forrit on the wab,
a bluidy corp.
When the corp was examined the leid draps hadnae played buff upon the
warlock's body; sorrow a leid drap was to be fund; but there was
grandfather's siller tester in the puddock's heart of him.
* * * *
|