hip never ca'd me sic a word as that before. Ohon! that I
suld live to be ca'd sae," she continued, bursting into tears, "and me a
born servant o' the house o' Tillietudlem! I am sure they belie baith
Cuddie and me sair, if they said he wadna fight ower the boots in blude
for your leddyship and Miss Edith, and the auld Tower--ay suld he, and I
would rather see him buried beneath it, than he suld gie way--but thir
ridings and wappenschawings, my leddy, I hae nae broo o' them ava. I can
find nae warrant for them whatsoever."

"Nae warrant for them?" cried the high-born dame. "Do ye na ken, woman,
that ye are bound to be liege vassals in all hunting, hosting, watching,
and warding, when lawfully summoned thereto in my name? Your service is
not gratuitous. I trow ye hae land for it.--Ye're kindly tenants; hae a
cot-house, a kale-yard, and a cow's grass on the common.--Few hae been
brought farther ben, and ye grudge your son suld gie me a day's service
in the field?"

"Na, my leddy--na, my leddy, it's no that," exclaimed Mause, greatly
embarrassed, "but ane canna serve twa maisters; and, if the truth maun
e'en come out, there's Ane abune whase commands I maun obey before your
leddyship's. I am sure I would put neither king's nor kaisar's, nor ony
earthly creature's, afore them."

"How mean ye by that, ye auld fule woman?--D'ye think that I order ony
thing against conscience?"

"I dinna pretend to say that, my leddy, in regard o' your leddyship's
conscience, which has been brought up, as it were, wi' prelatic
principles; but ilka ane maun walk by the light o' their ain; and mine,"
said Mause, waxing bolder as the conference became animated, "tells me
that I suld leave a'--cot, kale-yard, and cow's grass--and suffer a',
rather than that I or mine should put on harness in an unlawfu' cause,"

"Unlawfu'!" exclaimed her mistress; "the cause to which you are called by
your lawful leddy and mistress--by the command of the king--by the writ
of the privy council--by the order of the lordlieutenant--by the warrant
of the sheriff?"

"Ay, my leddy, nae doubt; but no to displeasure your leddyship, ye'll
mind that there was ance a king in Scripture they ca'd Nebuchadnezzar,
and he set up a golden image in the plain o' Dura, as it might be in the
haugh yonder by the water-side, where the array were warned to meet
yesterday; and the princes, and the governors, and the captains, and the
judges themsells, forby the treasurers, the couns