rous sair.
_Balow_, etc.

Bairne, sin thy cruel father is gane,
Thy winsome smiles maun eise my paine;
My babe and I 'll together live,
He'll comfort me when cares doe grieve;
My babe and I right saft will ly,
And quite forgeit man's cruelty.
_Balow_, etc.

Fareweil, fareweil, thou falsest youth
That ever kist a woman's mouth!
I wish all maids be warned by mee,
Nevir to trust man's curtesy;
For if we doe but chance to bow,
They'll use us then they care not how.
_Balow, my 'babe, ly stil and sleipe!
It grieves me sair to see thee weipe._

ANONYMOUS.

MY HEID IS LIKE TO REND, WILLIE.

My heid is like to rend, Willie,
My heart is like to break;
I'm wearin' aff my feet, Willie,
I'm dyin' for your sake!
O, say ye'll think on me, Willie,
Your hand on my briest-bane,--
O, say ye'll think of me, Willie,
When I am deid and gane!

It's vain to comfort me, Willie,
Sair grief maun ha'e its will;
But let me rest upon your briest
To sab and greet my fill.
Let me sit on your knee, Willie,
Let me shed by your hair,
And look into the face, Willie,
I never sall see mair!

I'm sittin' on your knee, Willie,
For the last time in my life,--
A puir heart-broken thing, Willie,
A mither, yet nae wife.
Ay, press your hand upon my heart,
And press it mair and mair,
Or it will burst the silken twine,
Sae strang is its despair.

O, wae's me for the hour, Willie,
When we thegither met,--
O, wae's me for the time, Willie,
That our first tryst was set!
O, wae's me for the loanin' green
Where we were wont to gae,--
And wae's me for the destinie
That gart me luve thee sae!

O, dinna mind my words, Willie,
I downa seek to blame;
But O, it's hard to live, Willie,
And dree a warld's shame!
Het tears are hailin' ower our cheek,
And hailin' ower your chin:
Why weep ye sae for worthlessness,
For sorrow, and for sin?

I'm weary o' this warld, Willie,
And sick wi' a' I see,
I canna live as I ha'e lived,
Or be as I should be.
But fauld unto your heart, Willie,
The heart that still is thine,
And kiss ance mair the white, white cheek
Ye said was red langsyne.

A stoun' gaes through my heid, Willie,
A sair stoun' through my heart;
O, haud me up and let me kiss
Thy brow ere we twa pairt.
Anither, and anither yet!--
How fast my life-strings break!--
Fareweel! fareweel! through yon kirk-yard
Step lichtly for my sake!

The lav'rock in the lift