let the leddy alane wi' your whiggery? And I was e'en as great
a gomeral to let ye persuade me to lie up here amang the blankets like a
hurcheon, instead o' gaun to the wappen-schaw like other folk. Odd, but I
put a trick on ye, for I was out at the window-bole when your auld back
was turned, and awa down by to hae a baff at the popinjay, and I shot
within twa on't. I cheated the leddy for your clavers, but I wasna gaun
to cheat my joe. But she may marry whae she likes now, for I'm clean dung
ower. This is a waur dirdum than we got frae Mr Gudyill when ye garr'd me
refuse to eat the plum-porridge on Yule-eve, as if it were ony matter to
God or man whether a pleughman had suppit on minched pies or sour
sowens."

"O, whisht, my bairn, whisht," replied Mause; "thou kensna about thae
things--It was forbidden meat, things dedicated to set days and holidays,
which are inhibited to the use of protestant Christians."

"And now," continued her son, "ye hae brought the leddy hersell on our
hands!--An I could but hae gotten some decent claes in, I wad hae spanged
out o' bed, and tauld her I wad ride where she liked, night or day, an
she wad but leave us the free house and the yaird, that grew the best
early kale in the haill country, and the cow's grass."

"O wow! my winsome bairn, Cuddie," continued the old dame, "murmur not at
the dispensation; never grudge suffering in the gude cause."

"But what ken I if the cause is gude or no, mither," rejoined Cuddie,
"for a' ye bleeze out sae muckle doctrine about it? It's clean beyond my
comprehension a'thegither. I see nae sae muckle difference atween the twa
ways o't as a' the folk pretend. It's very true the curates read aye the
same words ower again; and if they be right words, what for no? A gude
tale's no the waur o' being twice tauld, I trow; and a body has aye the
better chance to understand it. Every body's no sae gleg at the uptake as
ye are yoursell, mither."

"O, my dear Cuddie, this is the sairest distress of a'," said the anxious
mother--"O, how aften have I shown ye the difference between a pure
evangelical doctrine, and ane that's corrupt wi' human inventions? O, my
bairn, if no for your ain saul's sake, yet for my grey hairs"--"Weel,
mither," said Cuddie, interrupting her, "what need ye mak sae muckle din
about it? I hae aye dune whate'er ye bade me, and gaed to kirk whare'er
ye likit on the Sundays, and fended weel for ye in the ilka days besides.
And that's what vex